El vienres 27 de setiembre coincidiendo col Díi Mundial del Turismu, Xixón Turismu entama a les 22h una visita guiada y de baldre a Cimavilla coincidiendo cola Nueche Blanca. Van visitase les Termes Romanes y la Casa Natal de Xovellanos.

El viernes viniente, 27 de setiembre, celébrase’l Día Mundial del Turismu. Xixón Turismu quier xunise a la efeméride organizando una visita guiada nocherniega a Cimavilla, que coincidirá, amás, cola Nueche Blanca.

Los asistentes van conocer la hestoria y les anéudotes del barriu altu, de les sos xentes, los sos xeitos, del so pasáu romanu y mariñán, visitar la Casa Natal de Xovellanos y les Termes Romanes de Campu Valdés y, tamién, ver delles actividaes que los museos tienen programaes pa esa nueche.

En concreto, la visita guiada va parar na Casa Natal de Xovellanos pa la representación de ‘Las gemelas de palacio’, de la Compañía Luz, micro y Punto; nes Termes Romanes pa esfrutar de ‘Estrígil’, espectáculu de danza de Dana Raz Dance Projects; y va terminar na Plaza l’Institutu, onde se podrá ver la proyeición audiovisual ‘Xixón romanu’, que se va proyeutar na fachada del CC Antiguu Institutu.

La visita va escomencipiar na plaza’l Marqués a les 22h y va terminar na plaza l’Institutu a les 24h. La visita ye de bladre. Places llendaes. Ye preciso inscribise primero n’Infoxixón (Puertu Deportivu / tel. 985 34 17 71 / infogijon@gijon.info)

Redaición InfoAsturies

This work is licensed under a Creative Commons Attribution 4.0 International License.