L’Asamblea de Paraos y Paraes, col sofitu d’Andecha Astur, convoca una Llimpieza de la Sablera de Peña María, al par d’Aboño
Con esta recoyida non solo quieren apurrir el so granín de sable na llimpieza l’entornu asturianu sinon que, principalmente, pretenden denunciar la falta d’implicación del gobiernu d’Asturies nes llabores de llimpieza y caltenimientu de les aríes naturales asina comu nel control de residuos. Tamién revindicarán un modelu de produción que xenere más emplegos dignos y menos basoria.
“Queremos trabayu, non borrafes. Nun queremos los desechos de los turistes nin de la termica mal xestionada y obsoleta, nin los del muselón. Queremos un trabayu caltenible col mediu que nos arrodia, con condiciones dignes, y non a cualquier preciu” declararon dende l’Asamblea de Paraos y Paraes.
Per otru lláu, recalcaron dende Andecha, “esta basoria ye consecuencia d’un sistema de producción y consumu capitalista, global y enfotáu nel xorrecimientu continúu, pal que l’únicu enfotu ye l’económicu, y que considera que tolo que mos arrodia -incluyendo la ñatura y a les mesmes persones- nun son más que medios de produción, perfechamente refugables una y bones nun yos son necesarios“. Sicasí, reconocen qu’esti nun ye un trabayu que correspuenda facer a la ciudadanía, sinon que correspuende a les autoridaes contratar a xente pa que lo faiga, cola consecuencia positiva de la creación de decenes de puestos de trabayu.
El programa ye quedar a la una la tardi na entrada que llenda con Xivares y avanzar dende ellí dica la ría d’Aboño, recoyendo tola basoria que s’alcuentre pel camín. Al final habrá un actu nel que falarán los representantes de les organizaciones participantes, desplicando l’envís d’esta actividá.
Nuria Prendes
This work is licensed under a Creative Commons Attribution 4.0 International License.
