Alrodiu de 300 persones venies de toa Asturies presumieron de paxellu na cuarta xornada dedicada al traxe’l país, en Grau

La mañana’l domingu la Plaza los Dolores tornóse’n pasarela de moda pela que desfilaron los traxes de pastor, de ricu, de probe y de mariñán, d’estameña y de pañu fino, de costa ya de montaña, un escaparate completu de la xeografía ya’l pasáu asturianos al traviés del vistir, allonxáu de tou folclorismu ya invención. Los traxes de la mariña foron los más apreciaos pol xuráu, que dio’l premiu al meyor traxe de muyer a ún de llanisca, diendo a recayer el de categoria masculina nun traxe candasín. Sicasí, la calidá y l’abondancia de traxes participantes – 50 nesta edicion- fexo abegoso la decisión al xuráu, integráu por Consuelo Riu, Ana Villanueva, Constantino Menéndez y Amadeáu Benavente. Enriba los premios en metálicu -de 100, 150 y 200 €-  los ganadores van recibir unes lligues, de diseñu esclusivo, que van poder llucir atando les medies y acreditando l’honor de ser los que se vistieron con meyor xeitu de la edición de 2019.

Amás de los participantes, cientos d’asturianos foron a pasiar arguyosos el so traxe peles cais de Grau nesti certame que ñació va 4 años col envís de dar valor al traxe’l país,  pa esparder el conocimientu de la nuestra ropa tradicional y pa promover la escelencia nel vistir y na confección de prendes tradicionales. Quier ser tamién un estímulu y un reconocimientu de les persones que fueron faciendo traxes del país con aciertu y fidelidá a la tradición. Un díi pa sentise arguyosos de nos y de la nuesa ropa.

Nuria Prendes

This work is licensed under a Creative Commons Attribution 4.0 International License.