Depués de recoyer 27 kg de basoria y una bolsa de piedres de carbón, la playa sigui no fundamental puerca

La llimpieza de la sablera Peña María-Xivares nun dió de si tantu comu podía temese “namás” 27 kg de plásticos, filtros, cuerdes, llates y otres basories, amás d’una bolsa enllena de piedres de carbón. Atrás quedó una sablera aparentemente llimpia, pero qu’al averase se ve debuxada d’una a otra esquina con manches prietes.

Nun hai falta dir mui lloñe p’albidrar el so orixe: llevantando la vista damos col depósitu de carbones, montañes de carbón trayíu per mar -por que l’asturianu contamina, que por eso presllamos les mines- y amontonáu albentestate. L’aire perriba les tonelaes de carbón ye buxo, seique nun sopla’l vientu, ye fácil albidrar que pasa coles ñubes de carbón namás que tira l’aire.

Nun ye solo eso, los barcos pierden, nel so camín al desembarcu, piedres que van dar a la costa y se desfaen d’a pocu; podría dicise que la de Peña María ye una sablera combustible, en función de la cantidá de mineral.

Tou ello ensin cuntar el coleutor que desemboca na sablera, lliteralmente un ríu de mierda direutamente arramáu a los pies de los bañistes.

Otra cosa que s’alcuentra en camín, per tola playa, son animales muertos, cámbaros, especialmente, pero tamién dalgún centollu y dalgún pexe.

“Pal sistema capitalista esta sablera, el paisaxe asturianu, Asturies, lo mesmo que los asturianos, nun somos más que recursos empresariales, materiales qu’utilizar o desdexar en función de que seyamos o non necesarios pa los sos intereses económicos. Equí desiximos, non solo la implicación del gobiernu na llimpieza de la costa y nel control de contaminantes, sinon la creación de puestos de trabayu, dignos, pero que nun impliquen dañu al nuesu entornu. Sabemos que ye posible.” Declaró Llucía Fernández, una de les participantes na llimpieza, en representación d’Andecha Astur.

This work is licensed under a Creative Commons Attribution 4.0 International License.