El domingo 13 el Muséu del Pueblu d’Asturies aconceyará a les families qu’apuesten pol asturianu nuna xornada d’arruelu, esporte y música pensada pa los más piqueños de la casa

L’Asociación Cultural Reciella cellebra, de magar l’añu 2.013, esta folixa abierta a tol que quiera averase y na que toles actividaes -que son abondes- tienen como llingua vehicular esclusivamente l’asturianu.

La xornada entamará a les once y media, cola IV Entaina, la prestosa carrera familiar na que, pente muncha risa ya un pocu d’esporte, se representa el pasu del testigu de la llingua asturiana d’una xeneración a otra, de güelos a pas y de pas a fios. Seique a les once tará abierta la iscripción, ye recomendable facela previamente, pa facilitar la organización de la mesma, ya que se cuenta que vaiga ser multitudinaria.

L’esporte siguirá siendo un de los protagonistes: fúbol, baloncestu, skateboard… cualquier esporte ye afayaizu pa ser retrasmitíu n’asturianu. A lo llargo’l díi sucederánse los talleres, pa tolos gustos y estremaes edaes: youtubers, poesía, baille, débuxu… y música, muncha música. Una xornada serondiega d’alcuentru nel que les families asturfalantes pueden esfrutar na llingua llariega y les que nun lo son pueden averase pa dir deprendiéndola.

Redaición InfoAsturies

This work is licensed under a Creative Commons Attribution 4.0 International License.