Consideren que tienen que continuar dando a los asturianos una opción pa facer oyir la so voz al traviés d’Agora Repúbliques y pa espresar el so descontentu colos partíos españoles, a los que faen responsables d’esta repetición elleutoral

La formación, con Arturu Bermeyu y Ana Fernández comu cabeces de llista pal congresu y pal Senáu respeutivamente, ye la única opción política asturiana que tará presente, ello ye, la única que tien a Asturies como únicu ámbetu d’aición y decisión. Amás, ye enforma probable que seya la única qu’ufra la posibilidá de votar n’asturianu.

Andecha Astur representa a Asturies na rede de defensa de los pueblos sometios al estáu, vindicando’l so futuru comu repúbliques, xunto con Euzkadi, Catalunya, Galicia, Aragón, Canaries y otros pueblos. Poro, deciden presentase a estes elleiciones estatales pesi a declarase coscientes de la so mediatización y de que nun dexen de ser una comedia qu’espeya’l fracasu de los partios españoles.

Los exes del so programa, neto que nes elleiciones anteriores, son la defensa de les llibertaes individuales y colleutives, el drechu a trabayar y vivir dignamente dientro d’Asturies,  finando cola emigración forciada de la mocedá asturiana y favoreciendo la repatriación al traviés de la tresformación y la xusticia social y la reactivación del texíu socio-económicu asturianu. El desendolcu caltenible, la cultura, la llingua, ya’l padremoñu son tamién pegoyos de la so propuesta.

Piden a los asturianos que reflexonen sobre el tratu que van dando los partios españoles a Asturies nes caberes décades y nes consecuencies que les sos polítiques tuvieron sobre el país y, en consecuencia, dirixan el so votu a aquellos pa los qu’Asturies ye una prioridá, tal comu espeyen nel so llema elleutoral:

¿Y si agora votes por Asturies?

This work is licensed under a Creative Commons Attribution 4.0 International License.