Dende la estaya sindical de CSI en ArcelorMittal cuestionen el discursu de catastrofismu y emerxencia que plantega la multinacional del aceru, a la qu’acusen d’utilizar situaciones coxunturales pa presionar y chantaxear
Nel comunicáu espublizáu pola CSI denuncien que de magar la familia Mittal mercó les plantes asturianes nun fexo otra cosa que xenerar incertidume al tiempu que ganen los sos beneficios van n’aumentu.
Nel exerciciu 2018 ArcelorMittal albamó más de 4.500 millones d’euros en beneficios, cuasi 500 más que nel añu anterior; amás, la multinacional vien d’abrir una nueva llínia de galvanizao en Florange (Francia) y ta acondicionando les plantes d’Ilva (Italia). Tou ello contrasta col panorama debuxáu pola empresa, que fala de “mercáu global camín d’una nueva recesión, cayíes nes ventes, enfeblecida industria Europea…”.
Amparándose nesos argumentos, dende Arcelor soliciten midies proteicionistes pa la industria l’aceru, ello ye, que con dineru públicu se yos rebaxen los costes de produción, ensin ufrir a cambiu compromisos de futuru.
Al tiempu, denuncien dende CSI, la factoría presenta una media de 200.000 hores estres al añu, namás en personal propiu, hores que pal sindicatu son parte d’una estratexa de sobreprodución planificada pa con ella poder xustificar les actuales midies: el preslle de les bateríes de cok n’Avilés y del fornu altu de Xixón y los ERES que se ven venir.
Redaicón InfoAsturies
This work is licensed under a Creative Commons Attribution 4.0 International License.
