A les poques hores de conocese la sentencia del Proces, una concentración n’Uviéu convocada por Lluchando pola Soberanía amosaba’l so sofitu al pueblu catalán y ayeri Andecha Astur emitía un comunicáu alertando “Ye Catalunya, ye Asturies, ¡Somos toos y toes!”
Namás conocese la sentencia, la dureza de les condergues contra los políticos catalanes del “Procés” saltó a la prensa internacional: dende los medios anglosaxones dica los árabes, dende los rusos dica los francófonos, toos se ficieron ecu de la noticia y la interpretación de la mesma ye unánime: el castigu, inxustu y desproporcionáu incluso pa les mui parciales lleis españoles, namás puede lleese comu un avisu exemplarizante escontra cualisquier intentu d’exercer el drechu a decidir; non en vano #spainisafaciststate se tornó trending topic en menos de 24 hores.
El primer mensaxe solidariu “d’urxencia” qu’aportó dende Asturies a Catalunya, denunciando la represión al procesu soberanista catalán, tuvo llugar n’Uviéu el mesmu 14 d’Ochobre, unes hores depués de conocese la sentencia. Al mesmu tiempu concentraciones solidaries n’Euskalherría, Andalucía, Escocia, Irlanda, Arxentina y otros munchos países acusaben al estáu español de facista y represor.
Nel comunicáu espublizáu ayeri por Andecha Astur alertase de que lo que güei carez el pueblu catalán aportará a tou aquel que quiera decidir llibremente la so forma de gobiernu “Nesti casu ye’l pueblu catalán el que sufre les consecuencies d’un Estáu antidemocráticu, pero’l mensaxe de fondu va dirixíu escontra tolos pueblos del Estáu qu’aspiramos a un sistema democráticu nel que decidir si queremos república o monarquía, sumisión o soberanía, nun suponga cárcel y represión”.
Dende’l Bloque Críticu d’Asturies faense ecu tamién de la brutalidá de la represión que se carez estos díes en Catalunya y dende la CNT inciden nel pelligru de la criminalización de la protesta y de la democracia “Tal comu ta redactada la sentencia, cualisquier aición pública, por mui non-violenta que seya, puede ser tipificada comu delitu de sedición: un piquete, una sentada, una paralización de desfiuciu… Esto ye un ataque frontal a los nuesos drechos fundamentales y nun tenemos de ser inxenuos, tarde o temprano usaráse contra nosotros” escribíen nes sos redes sociales.
Na base del problema, la dependencia política del corrutu sistema xudicial y la sagrada xunidá d’España “les aspiraciones del pueblu catalán como les d’otros pueblos del Estáu, choquen siempres escontra la “sagrada xunidá d’España” -como persabemos n’Asturies tres l’ochobre’l 34- que, tres cuasique mediu sieglu de la so democracia, sigue ensin poder cuestionase por métodos pacíficos” diz el comunicáu d’Andecha Astur.
Nel mesmu sen espresábase el filólogu asturianu Ramón d’Andrés, nel so blog El Miradoriu, tornando en pallabres el mensaxe qu’España envía a tolos pueblos del estáu “Pa la costitución de la Nación Española importayos un carayu la voluntá de los catalanes y de quien seya, porque la Nación Española ye un conceutu esencial que tresciende’l poder de decisión de los seres humanos convertios en ciudadanos». Y más entá: «Tragaréis cola Nación Española malque seya a guelpe de porres o de lleis converties en martillu de drechos».
Nuria Prendes
This work is licensed under a Creative Commons Attribution 4.0 International License.
