Nun intre marcáu pola denuncia internacional del estáu español por facista y nuna Asturies fundía nuna crisis económica, demográfica y social de la que’n bona midía ye culpable’l reinu d’España, la concentración que tolos años protagonicen miles d’asturianos escontra los reis nel marcu de los Premios Principiegos promete ser multitudinaria.
La cita ye esti vienres 18 d’ochobre, dende les 17:00 na Plaza La Escandalera (Uviéu)
Nun intre nel que’l Reinu d’España, la so democracia y la so xunidá tan siendo seriamente puestos en tela de xuiciu per bona parte de la sociedá, ya’l sintir republicanu ye mayoritariu n’Asturies, la monarquía española trata de llavar la cara y llexitimizar la so esistencia a costa de remanar los espacios que correspuenden al pueblu asturianu y falsiar la hestoria, tratando de facer escaecer a la población que son los heriedos direutos de la dictadura franquista.
Mañana los republicanos asturianos tornarán amosar la so refuga a los reis d’España, a pocos metros del Teatru onde les sos maxestaes tarán faciendo entrega de los Premios Principiegos. La concentración ta convocada de magar les 5 la tardi, cuando entamen a aportar los primeros convidaos, y continuará demientres tola entrega de premios, faciéndose sentir perriba les barreres policiales que, comu cada añu, tratarán de facer lo menos visible la presencia de los manifestantes.
L’oxetivu d’esta concentración ye duple: reclamar una República, espeyando el non reconocimientu de la monarquía española por parte de los asturianos, y denunciar los premios Principiegos, un torpe intentu de llavar la imaxen de la monarquía, entamaos por una fundación corrupta, el patronatu de la Fundación Princesa, onde tan les grandes fortunes d’España y dalgunos de los más direutos responsables de la crisis económica que carecemos.
Sigún les declaraciones d’Ana Fernández, candidata d’Andecha Astur pal senáu nes prósimes elleiciones “Nunca comu agora, cuando l’españolismu ta amosando la so cara más violenta y represora, en plena espresión del capitalismu más xabaz y de falta de llibertaes individuales y coleutives, foi tan necesario dar una rempuesta na cai a la vergoñosa esibición d’españolismu colonialista que tien a los monarques d’España comu protagonistes.
Ello asina, faise un llamamientu al conxuntu del Pueblu Asturianu a participar na concentración convocada pal prósimu vienres 18 d’ochobre, de magar les 17 hores na Plaza la Escandalera d’Uviéu, de manera que’l recibimientu a los reis d’España na entrega de los Premios Principiegos se torne n’espeyu de la refuga a la monarquía y a los Borbones que ye, como amuesen les encuestes, mayoritariu ente’l pueblu asturianu.
Llucía F. Marqués
This work is licensed under a Creative Commons Attribution 4.0 International License.
