Ante la pasividá del gobiernu asturianu, que permite y afala la discriminación llingüística incluso nes sos mesmes istituciones, y ante la complicidá de los partios españoles que se dicen defensores de los drechos llingüísticos de los asturianos, pero que nun actuen al respeutu, Andecha Astur lleva el casu al Defensor del Pueblo, pa qu’interponga Recursu d’Incostitucionalidá

Tres de – la prohibición a utilizar l’asturianu na Xunta Xeneral a la propia Conseyera de Cultura, Política llingüística y Turismu y les menacies esplícites por parte de la drecha española n’Asturies de boicotear con tolos sos medios l’usu del asturianu, Andecha Astur presentó ayeri un escritu al Defensor del Pueblo, Sr. Fernández Marugán, solicitando que s’interponga Recursu d’Incostitucionalidá escontra la resolución de los Lletraos de la Cámara, o nel so casu escontra’l propiu Reglamentu de la Cámara de la Xunta Xeneral d’Asturies pa que la llingua asturiana nun pueda ser oxetu de discriminación baxo dengún motivu en denguna istitución asturiana.

Nel so escritu informen al Defensor del Pueblo de la situación de pelligru en que s’alcuentra la llingua asturiana y del acosu que la mesma carez por parte de ciertes alministraciones, esplicando con detalle lo asocedio na Comisión Parlamentaria del 1 d’Ochobre, cuando María Gloria García Lee, del PP, y-desixó falar n’español, cuntando pa ello col sofitu de la socialista Lídia Fernández , presidenta de la cámara.

Comu argumentos, apurren testos de la Costitución española nos que se recueye el llibre usu de les llingües nel estáu, y del Reglamentu de la Cámara, que nel so art. 11 diz testualmente: “Nel marcu de lo dimpuesto pol Estatutu d’Autonomía y, nel so casu, pola llexislación que lo desendolque, los Diputaos podrán utilizar el bable nel exerciciu de les sos funciones parlamentaries” “…. promoviendo asinamesmo l’usu del bable nel exerciciu de les funciones parlamentaries, nel marcu l’Estatutu d’Autonomía”.

Esti caberu recueye nel so articuláu dellos puntos, ampliaos na Llei d’Usu y Promoción, qu’afalen a la proteición y usu de la llingua asturiana, asegurando “el so llibre usu y la non discriminación de los ciudadanos por esti motivu” teniendo “tolos ciudadanos drechu a emplegar l’asturianu y a espresase nelli, de pallabra y por escrito” especificando nel puntu 4.3 d’esta llei que “El Principado de Asturias propiciará el conocimientu del asturianu por tolos emplegaos públicos que desendolquen el so llabor n’Asturies.”

Denuncien por tou ello la inxusta y grave situación de discriminación a la que tamos sometios los asturfalantes na nuesa propia tierra, reclamando nel mesmu testu la Oficialidá como mecanismu indispensable pa la fin de la represión llingüística n’Asturies.

Andecha Astur ya denunciare estos fechos de pallabra ente la Comisión Europea y entrugó formalmente a la mesma –al traviés del grupu Agora Repúbliquesdel que forma parte.

Nuria Prendes