CCOO informa del descensu d’escolinos matriculaos en llingua asturiana. El casu de Belén, una rapacina enfotada n’estudiar la so llingua pero a la que se-y torga’l so drechu, espeya perfechamente a lo que s’enfrenten cientos de families asturianes a la hora de matricular a los sos fios n’asturianu
Setiembre 2.019 – Belén tien 16 años y quier dir a clas de llingua. Matricúlase d’ello, perdiendo de pasu la oportunidá d’estudiar otres coses que bien-y prestaríen, comu francés o informática, pero segura -ella y la so familia- de que lo primordial ye conocer lo propio.
13 Setiembre 2019 – Llamen a la má de Belén del Istitutu pa informala de que’n 4º A namás ta la so fía apuntá a llingua y que nun-y lo dan, qu’escueya francés. Sonia (la má) retruca que non, que nun son franceses, que son asturianes, a lo que del cientru retruquen que nun van da-y clas a ella sola. De fechu, lleguen a matriculala n’otra asignatura ensin permisu de la familia.
Comu Sonia ye una persona concienciada y nun quier renunciar tan fácil a los sos drechos, en llugar de dase Solicita conceyu col direutor del cientru pal llunes viniente. Entantu ponse’n contautu cola estaya d’educación d’Andecha Astur pa informase de comu tien que xestionar la cuestión.
Ellí infórmenla de qu’hai sentencia xudicial firme ya inapelable qu’elimina la ratio mínima pa dar clases d’asturianu, ello ye, que tien tol drechu a desixir un profesor/a d’asturianu pa la so neña. Recomiénden-y meter nel rexistru del cientru un pidíu escritu, con copia sellá en rexistru, de lo que se demanda, desixendo que se-y retruque tamién per escrito, apurriéndose-y tola documentación precisa y los documentos xurídicos qu’avalen la so pidición.
18 Setiembre 2019 – Sonia escribe “Ya ta arreglao, va tener tres hores de llingua. Cuando fui y vieron que conocia los drechos a dalo nun yos quedó otra . Van agora a facer los horarios nuevos y nun creo que haiga más problemas.a profe de llingua ta a media xornada y al dar Belén llingua tien que tar a xornada completa y tienen que pidilo a conseyería,a ver que non den guerra”. Sicasí, anantes d’aportar a ello la tutora tornó a facer por convencela de que diere francés o informática. Namás el conocimientu de los drechos que tinía y lo firme de la decisión d’esta familia fizo que nun se rindieren y tiraren p’alantre.
26 Setiembre 2019 – Continúen presionando pa que camude a informática “más importante pal so futuru”. Lleguen a presionar direutamente a la neña. Entá nun tien profe de llingua. Del cientru comuniquen que tan esperando l’asignación de tres nuevos profesores y qu’un d’ellos dara-y asturianu. La ma insiste en que seya daquién colos conocimientos y titulación necesario pal niverl de 4º de la ESO.
23 d’Ochobre 2019 – Belén sigui ensin clas de llingua. Nun manden profesores cualificaos. La ma afirma que va pillando a dellos docentes con mentires al respeutu (entamando pola primera, cuando la quisieron convencer de la cuestión del ratio). La profesora d’asturianu del istitutu, contratada a media xornada y a la que tendría de contratase-y a xornada completa pa da-y clases a Belén, ta de baxa y nun se cubre, asina que naide tien clas d’asturianu. Nun se sabe si la plaza nun ta ufiertada (centenares d’interinos tan naguando por trabayar) o si ta ufiertada comu media xornada y naide la garra (les places a media xornada nun son d’aceutación obligatoria y la precariedá qu’impliquen, al tener que desplazase d’un estremu a otru d’Asturies pa cobrar mediu sueldu, faen que naide les quiera). El casu ye que va pa mediau el primer trimestre y Belén nun dio un díi de clas d’asturianu. Eso si, dio delles clases de TIC, asignatura na que nun ta llegalmente matriculada. A estos altores ya saben de munchos otros escolinos del mesmu istitutu que pasaron por un procesu asemeyáu pero que finaron por abandonar la idega de dar llingua.
La familia ta estudiando el viniente pasu a dar.
Güei CCOO anunciaba’l descensu d’escolinos matriculaos en llingua. Esti ye ún namás de los cientos de casos de rapacinos a los que se yos torga fasta l’infinitu l’acesu a les clases d’asturianu, y non toles families tienen la convicción, l’enfotu y la moral que tien Sonia.
Vamos dar un repasu a los pilancos colos que s’alcuentren les families que quieren l’asignatura d’asturianu:
1 – Tener que renunciar a otra asignatura importante (otru idioma, informática…)
2 – Que te digan que nun se cubre la ratio. Ye una mentira perespardía que diretutores y xefes d’estudios repiten ensin ponese colloraos -lo que seya p’aforrar un salariu- y ante la que caen la mayoría les families afeutaes, qu’a la fin tan peravezaes a la discriminación llingüística y nun tienen porque saber de lleis.
3- Presión direuta sobre l’escolín. Matriculación forciada n’otres asignatures.
4- Imposición pola fuercia:cenciellamente, nun-yos dan clas. Nun se contrata profesor. puntu
En cualisquiera d’estos puntos ta’l furacu pel que coló bona parte d’esi 14´5% d’escolinos.
This work is licensed under a Creative Commons Attribution 4.0 International License.
Home, pueo decite que a mi pasome igual. Toi ya finando la carrera, pero vaya, a 12 guajes garraronos el director cuando fuimos a pedir la clase de llingua y pusose a decinos que yeramos pocos (La clase igual yeran 22 guajes en total, y pal grupo de francés había 4), y con tola cara dixonos que nun dibamos dar llingua, que nun yeramos bastantes, y que yera más importante que diesemos “informática”, amás por un paisano que nun tenía ni pijotera idea de qué taba dando porque “eso él estudiolo facía ya 4 años, nun se alcordaba”, que llueu resultó ser afiliau del PP y tuvo movida por poner pijaes pol twitter del instituto (Sorpredíos toos ¿eh?). Y el míu nun ye l’únicu casu la zona, en Mieres pasayos lo mesmo, y sé de guajes abondio que en Uvieu y Xixón nun-yos dan les clases de LLingua polo mesmo. Ye pa cagase