Asturies con Bici preslla’l calendariu oficial d’actividaes pal 2019 con una marcha ciclista per Xixón -apta pa families- que finará nun magüestu abiertu a los participantes
El domingu 10 de Payares tendrá llugar l’Amagüestu d’Asturies con Bici, qu’aniciará con una concentración bicicletera a les 11:15 nel llocal social de l’asociación, na Cai Puertu Cerréu de Xixón, d’aú saldrá la marcha ciclista que, tres d’un percorríu cenciellu de 16 km per Xixón, pasando pela Vía Verdi de la Camocha y la Senda Fluvial finará nel Tendayu’l Muséu del Pueblu d’Asturies, onde se repartirán de baldre castañes y sidre dolce.
L’Asociación Llevántate y Danza animará la folixa con dances tradicionales d’Asturies ya’l restu’l mundiu y nun faltará la música de gaita. Al mesmu tiempu, nel mesmu Tendayu, tendrá llugar un mercaín bicicleteru con componentes y acesorios de bicicleta.
La organización pidi a los participantes que lleven el so propiu caciplu, p’amenorgar na midía lo posible la creación de residuos plásticos pol usu de vasos d’usar y tirar. Tamién afala a los asistentes a llevar xuegos y comida pa compartir. L’eventu ta abiertu a toles persones que quieran dir, seyan o non socies
Redaición InfoAsturies
This work is licensed under a Creative Commons Attribution 4.0 International License.
