El nuevu Decretu permite al gobiernu español llevar a cabu l’embargu arbitrariu de dominios, aplicaciones y redes

El BOE espublizaba ayeri el Decretu Llei aprebáu nel caberu Conseyu de Ministros del gobiernu en funciones sobro seguridá pública en materia d’alministración dixital y telecomunicaciones, una norma que yos permite presllar redes, webs y aplicaciones ensin previa orde xudicial, alegando “orden público”.

L’argumentu esgrimíu pa sacar alantre esta llei ye “frenar el desendolcu dixital de Catalunya y llendar les atribuciones de la Generalitat”, pa lo qu’otorga amplios poderes al executivu a la hora d’intervenir redes y páxines web, abriendo la puerte a la censura n’interné’n tol territoriu del estáu ante cualisquier conteníu que consideren peligrosu pal caltenimientu del so sistema. Una de les primeres afeutaes por esta norma sedrá la web de Tsunami Democràtic en polo menos dos dominios.

Trata con ello de torgar la comunicación y organización de movimientos ciudadanos al traviés de la rede, retayando de fechu les llibertaes y allugando a España un pasu más lloñe de la democracia.

Llucía F. Marqués

This work is licensed under a Creative Commons Attribution 4.0 International License.