De Xineru a Setiembre los afeutaos por un ERE son 774 más que nel mesmu periodu l’añu anterior, una cifra que se calcula sobre la del añu 2018, ya un 88’1% superior a la del añu anterior
Acordies los datos espublizaos pol Sadei -Sociedá Asturiana d’Estudios Económicos ya Industriales-, los afeutaos no que va d’añu por un espediente de regulación d’emplegu son un 78’6% más que nel mesmu periodu l’añu pasáu. N’España esti porcentaxe tamién medra, pero namás un 40%. Con ello esti sedrá’l segundu añu consecutivu d’espoxigue xabaz d’afeutaos polos EREs, ya que nel 2018 carecieron esta situación 2.891 persones, un 88’1% más que nel 2017.
Los espedientes de regulación d’emplegu (EREs) incluin los dispidos coleutivos, suspensiones de contratos y amenorgamientos de xornada, un total de 48 espedientes que sumen, pente Xineru y Setiembre del 2019, 1761 persones, frente a les 987 que se vieron afeutaes por una situación asemeyada nel mesmu periodu l’añu pasáu.
D’esi total, 116 trabayadores viéronse afeutaos por preslle definitivu y otros 43 por preslle parcial, entantu que 132 emplegaos vieron amenorgada la so xornada y 1.470 tan en suspensión temporal. Les consecuencies son estremaes en caún de los casos, ya que los afeutaos pol preslle, cenciellamente pierden el so emplegu, entantu que los que carecen una xornada amenorgada lo que ven ye disminuyios los sos ingresos pente un 10 y un 70% . Finalmente, los que tan en suspensión d’emplegu remanecen un tiempu indefiníu -la llei indica que tien de ser temporal, pero nun señala másimu pa ello- ensin trabayar, nun pudiendo aceder a prestaciones por desemplegu más que’n determinaes condiciones y arriesgándose a perder el puestu dafechu si se busca otru trabayu nel tiempu d’espera.
Esti espoxigue dase lligáu al desaniciu del texíu industrial asturianu, ya que ye esti el seutor más afeutau por esta triba de procesos de regulación d’emplegu.
Nuria Prendes
This work is licensed under a Creative Commons Attribution 4.0 International License.
