Esti vienres 15 Cerezal presentará el primer single, que da nome al so segundu discu: “La cereza’l cielu”

Con “La cereza’l cielu”, grabáu y mecíu nos estudios Tutu y masterizáu nos estudios Green Desert, amuesa la madurez del grupu ensin etiquetes ni techos. Un viaxe de trece cortes que surde d’una sorrisa y va desendolcando’l soníu propiu del grupu: ente’l folk acústicu y’l pop-rock, cola novedá del usu de recursos más propios dela música lletrónica.

Nun falten nel discu temes de más fondura, comu “Nun me dexar cayer” o “Na oriella Prieta”, ensin perder la llínia lliteraria de trabayos anteriores, con testos de Miguel Monteavaro, Xurde Fernández, el Padre Galo o Humberto Gonzali. Nesti trabayu tamién hai espaciu pa potentes instrumentales de corte tradicional (Bretaña) y fasta pa una versión mui personal de Thriller (Michael Jackson) con un aire ente’l bluegrass y el folk cerezaliegu. Nesti trabayu, asoleyáu en Payares de 2019, el grupu cuntió con abondoses collaboraciones: Juan Duarte y Ruboh a les voces, Nel Suárez (guitarra acústica), Álvaro Bárcena (guitarra lléutrica, Dobro y steel guitar), Fernando Oyagüez (Banxu), José Manuel Tejedor (Gaita), Rodrigo Joglar (Curdión), Xurde Fernández (Whistle), Pedro Santiago (Bodrhan), Javi Tejedor (Curdión), Marco A. Guardado (percusión), Rubén Alba (Gaita) y David Mori (Xiblata).

Cerezal entama col 2013, frutu de la xuntanza de dalgunes mentes inquietes dientro del panorama musical asturianu y nesti proyeutu confluyen artistes de llarga trayeutoria dientro de la música folk, pop y rock, faciendo del soníu Cerezal  daqué orixinal y enlleno matices que, con una fuerte base folk, avérase por momentos a estilos como’l jazz y el country, anque’l so soníu paez tar basáu n’estructures y armoníes más asemeyaes al pop. Nel so repertoriu, del too orixinal, garren pesu les composiciones musicales y les lletres, bien propies o bien obteníes a partir del trabayu lliterariu d’autores asturianos d’anguaño. Cerezal nun escaez los sos raigaños, faciendo revisiones ya igües de
diferentes temes presentes na tradición oral d’Asturies.

Redaición InfoAsturies

This work is licensed under a Creative Commons Attribution 4.0 International License.