L’Equipu gobiernu nun especifica au van destinar agora el presupuestu, dexando cayer que se utilizará “n’actividaes d’espardimientu de la cultura asturiana”, pero ensin concretar
L’Arcu Atlánticu ñacía va 8 años col envís de ser un puntu d’alcuentru pente les cultures atlántiques, coles qu’Asturies ta fondamente venceyada y coles que los asturianos compartimos un fondu raigañu. Demientres estes ocho ediciones desendolcáronse nel so marcu actividaes encadarmaes alrodiu la cultura, esporte, turismu y económía de les naciones participantes, utilizando pa ellos les cais, places ya edificios públicos del cientru de Xixón y del mariñán barriu de Cimavilla. L’usu del asturianu comu llingua vehicular, asina comu’l so calter específicamente cultural y de xermandá pente pueblos ya el so algame internacional, con participantes d’abondos países, fueron señes d’identidá d’esti Festival que fina agora la so andadura depués de namás ocho ediciones.
El PSOE prefier, comu ya declarare en so momentu l’alcaldesa, Ana González, sofitar actividaes braniegues d’otra triba, comu la macro feria d’atraciones de la Selmana Prieta o el Festival priváu Metrópoli. Ana González tamién consideró pocu adecuao que l’ochenta por cientu del presupuestu destináu a Arcu Atlánticu se destinare a la produción de les actividaes del mesmu Festival, alantrando que se camudará esi sistema de xestión, esin esclariar qu’otru fin cuenta dar a los fondos si nun ye al desendolcu d’actividaes.
En cuantes a la finalidá que se dará presupuestu destináu fasta agora al Arcu Atlánticu (174.000 euros na cabera edición) sedrá, sigún el gobiernu municipal, a la “promoción, difusión y fomento de la cultura asturiana”, pero ensin que s’especifique destín concretu nin proyeutos abiertos, lo que fae temer l’apaición d’un nuevu nichu de repartu de fondos del PSOE y les sos redes clientelares.
Ana González tamién consideró pocu adecuao que’l 80% del presupuestu destináu a Arcu Atlánticu se destinare a produción d’actividaes, ello ye, direutamente al festival mesmu, alantrando que camudará esi sistema de xestión, ensin esclariar tampoco a que van dedicar les perres si nun ye al desendolcu d’actividaes.
Llucía F. Marqués
This work is licensed under a Creative Commons Attribution 4.0 International License.
