Tres de cinco años escribiendo a diariu la so previsión metereolóxica, que compartimos n’InfoAsturies, el responsable de la páxina “El tiempu n’Asturies” recibe un mensaxe nel que se-y afala a escribir el so parte en castellán, baxo clares menacies

Dientro del continúu acosu que los asturfalantes carecen d’avezu, les menacies ya insultos al traviés de les redes sociales son ca vegada más avezaes, gracies al anonimatu y la llonxanía que permiten al agresor. Poro, ye perimportante que denguna quede ensin denunciar ya ensin rempuesta.

Ramiro Álvarez ye’l nome del perfil que, al traviés del facebook, llanzaba la viniente alvertencia “O aquí nos entendemos todos o salimos a hostias como en el 36″. Lloñe de garrar miéu ya ensin plantegase nin por un momentu camudar la llingua na que siempres escribe los sos partes metereolóxicos, la rempuesta foi denunciar publicamente l’acosu y reafirmase en siguir cola so llabor:

“Dempués de más de 5 años espublizando’l tiempu n’asturianu, güei por primera vegada a un fascista parez-y mui mal que lo faiga, yo quédome coles cientos de persones que me seguís y os presta lo que faigo. Non al fascismu, puxa la xente bona!!”. Les sos pallabres recibieron el sofitu de cientos de los sos siguidores.

El parte metereolóxicu de “El tiempu n’Asturies” puede lleese n’InfoAsturies o siguiendo la so páxina en facebook, na que cunta con cerca de 2.000 siguidores. Afalámosvos a ello, comu rempuesta a los ataques carecios.

Llucía F. Marqués

This work is licensed under a Creative Commons Attribution 4.0 International License.