La Selmana de la Montaña, que se cellebrará del 21 al 29 de Payares en Xixón, cuntará cola primicia de la cabera aventura de la meyor cordada del mundiu, los hermanos Eneko ya Íker Pou y cola presencia del hestóricu alpinista polacu Krzysztof Wielicki
L’eventu entamará esti xueves 21 y vienres 22 con un “previu” nel que se proyeutarán documentales y curtiometraxes na sede de l’Agrupación montañera Torrecerredo, de magar les 19:30 la tardi. El primer documental enllaza, baxo l’entítulu “Runners” a corredores de carreres de montaña, profesionales y amateurs. Darréu un curtiumetraxe narrará la cabera ascensión de Tomasz Mackievick, que morrió tratando d’algamar la cume del Nanga Parbat, la novena montaña más alta del mundiu. El vienres podrá vese la grabación “K2, touching the Sky”, nel que 4 de los fios de los participantes finaos nel ascensu del K2 faen por pescanciar la motivación de los sos pas.
Lo más destacable d’esta edición de la Selmana de la Montaña ye’l peraltu nivel de los ponentes, pente los que s’alcuentren grandes figures mundiales de la montaña, comu ye’l casu de los Hermanos Pou,que tan consideraos pente los meyores alpinistes del mundiu y que’l martes 26 presentarán en primicia’l so caberu trabayu, xunto col documental “Marejada Fuerza 6″ un finxu na hestoria del Picurriellu. Cuntaráse tamién cola presencia del polacu Wielicki, un históricu del alpinismu, que presentará personalmente una retrospectiva de la so vida nes montañes.
Otros ponentes sedrán Kiko Cerdá, que xunto a Martín Moriyón y Fernando Calvo presentarán el llunes 25″Integral del Cornión: Iviernu nos Picos” y Nicolás Adrao, Pepín Roán y Antonio Cuervas, cola proyeición el vienres 29 de “Esquí y navegación d’esploración nes Islles Lofoten”, sobre la so esperiencia nel Círculu Polar Árticu. Esi mesmu díe tendrá llugar un Homenaxe al Padre Bernardo, impulsor del montañismu xuvenil en Xixón. El xueves 28 proyeutaránse “Jurek”, un documental sobre l’alpinista polacu Jerzy Kukuczka y “Mama”, la hestoria de Kinga Ociepka, una de les figures más emportantes de les caberes décades que se plantega un nuevu oxetivu: esguilar per una ruta que denguna muyer fexo anantes.
This work is licensed under a Creative Commons Attribution 4.0 International License.
