Los trabayaores convoquen esta fuelga “fartucos de les manipulaciones ya inaición de los grandes sindicatos”, a los qu’acusen de traicionar los alcuerdos fechos n’asamblea, dexándolos ensin respaldu de dalu conveniu al escluyilos del xeneral ensin negociar un propiu. Acusen tamién a l’Alministración Pública Asturiana de desentendese del conflictu
Los 221 trabajaores, la mayoría muyeres, de los 21 Cientros de Díe d’Asturies taben venceyaos al Conveniu d’Aida a domiciliu y servicios afines, siendo la parte feble d’un conveniu ampliu ya heteroxéneu que regula actividaes estremaes y nel que teníen pocu pesu por ser un númberu muncho menor que los trabayadores d’otres de les actividaes contenies nesi conveniu. El conflictu surdió cola aprebación del conveniu coleutivu soscritu en 2014, nel que s’aprebó una rebaxa del so salariu en 20 € mes, cola oposición de los cientros de díe, pero ensin qu’esi votu fore abondu pa frenar la baxada.
Los Cientros de Díe entamen entós a desixir un conveniu coleutivu que los represente coles sos peculiaridaes, con un marcu regulatoriu propiu y xustu nel que tener voz y votu, daqué que foi aprebao mayoritariamente polos trabayaores nes dos ocasiones en que se yos propuso, abriendo una mesa de negociación pa la so creación ya especificando siempres que se caltendríen les condiciones del conveniu xeneral entanto’l propiu entamaba a ser un fechu.
Nel 2017 votóse la salida del conveniu nes condiciones pautaes, pero, no que pa los trabayaores ye una traición de los sindicatos mayoritarios (UGT y CCOO) foron escluyíos dafechu del conveniu d’Aida a Domiciliu ensin caltener les condiciones pautaes n’asamblea ya incumpliendo lo que los mesmos sindicatos informaren comu pactao.
La consecuencia ye una conxelación de les condiciones, ya males de por si, de magar el 2017. Lleven más de tres años ensin incrementos salariales y la empresa sigui ensin sentase a la mesa de negociación que se yos propuso nel 2018.
Na situación actual, la patronal ñégase a un Conveniu coleutivu propiu, pero al tiempu refuga negociar entrar en condiciones flesibles nel conveniu estatal. La única opción que se yos ufre a los trabayaores ye tornar a la situación anicial y a un conveniu nel que nun tienen voz nin votu, opción sofitada por UGT y CCOO. Poro, los trabayaores concluyen que la fuelga ye’l so únicu recursu.
Los díes convocaos pa la protesta foron el 5, 6, 13, 20 y 27 de Payares y los tres primeros parones ya tuvieron consecuencies: el boicot por parte de los direutores de los cientros y la decisión de la empresa de paralizar les nómines, amás d’un alcuerdu d’aconceyamientu de l’alministración col comite d’empresa (compuestu polos mesmos sindicatos que pautaron la traición que los trabayaores denuncien) na sede de Bientar Social nel qu’esponer les postures.
Caltiénense les xornaes de protesta convocaes pa güei y pal 27, con concentraciones a les 12 del mediudíe na cai Martínez Marina, n’Uvieu.
Llucía F. Marqués
This work is licensed under a Creative Commons Attribution 4.0 International License.
