El 30 de payares Teito Natural Roof va cellebrar en Somiéu la so primer Xornada d’Estudiu Teitos en Somiéu, col enfotu de buscar la meyor manera de caltener en pie esti importante elementu del padermoñu asturianu
L’Asociación Teito Natural Roof ñació nel mes de marzu d’esti mesmu añu col envís de protexer, dar a conocer y poner en valor los teitos, corros, chozos, pallozas y cabanas de cubrición vexetal con métodos arcaicos del Cordal Cantábricu, onde estes costrucciones caltuvieron usos milenarios tradicionales dica’l sieglu XXI, asina comu la so redolada tradicional, brañes, camperes y pueblos d’altu monte y de tola so cultura como la ganadería tradicional, los caminos ancestrales y los asentamientos de llabriegos y les sos construcciones como horros, caleros, fontes y zarros, incluyendo’l so llegáu cultural, material ya inmaterial como artes y oficios, toponímia, llingua, visión del mundu y microcosmos.
Esta xornada, que se cellebra’l prósimu sábadu 30 de Payares, va ser el so primer actu públicu y nella espondráse la evolución de los llogros y retos tres 30 años del inventariu de teitos realizáu en 1986, la so xustificación, oxetivos, resultancies, y la so situación actual de caltenimientu, para darréu estudiar conxuntamente les midíes a adoutar nel futuru.
Pa ello van cuntar cola presencia de téunicos, ganaderos, propietarios, teitadores, miembros del gobiernu, del conceyu y del Parque Natural de Somiéu. A la fin les intervenciones y meses redondes de toos ellos va tener llugar un coloquiu abiertu. La intención ye atopar una solución conxunta que dexe caltener nes meyores condiciones les más de 300 costrucciones con cubierta vexetal que perviven en Somiéu, la mayoría de titularidá privada, priorizando siempres los métodos tradicionales d’arreglu y caltenimientu.
Llucía F. Marqués
This work is licensed under a Creative Commons Attribution 4.0 International License.
