La decisión de nun destinar fondos al asturianu implica quitar a l’Academia la Llingua Asturiana la subvención prevista, desaniciando tamién la ufierta pa una plaza de Coordinador en Llingua Asturiana recoyía na Ufierta Pública d’Emplegu.
P’Andecha Astur, esto yera daqué previsible que podría evitase si nel so intre el Conceyu d’Uviéu afitare unes Ordenances d’Oficialidá “Cuando denunciemos que la política llingüística PSOE-Podemos nel Ayuntamientu d’Uviéu yera un paripé y que lo que facía falta yeren unes Ordenances d’Oficialidá, hebio quien nun lo entendió. Agora tenemos el resultáu, camuda l’equipu gobiernu y alón con too”
Pel so lláu, la Xunta pola Defensa de la Llingua Asturiana (XDLA) acusó al Conceyu d’Uviéu -PP y Ciudadanos- de “drecha provinciana” que “disprecia y arreniega de la llingua’l país” remembrándoyos la obligación, por llei, de velar por esi padremoñu cultural. Resaltaron tamién el potencial económicu perdíu pol dispreciu a la llingua asturiana. Por mirar un exemplu xeográficamente averáu, estudios fechos n’Euskadi amuesen que la llingua propio ye una importante fonte d’ingresos ya emplegu -nel so casu más de 56.000 emplegaos y 2.800 millones d’euros dependen d’actividaes venceyaes al so idioma-
This work is licensed under a Creative Commons Attribution 4.0 International License.
