Pa los vecinos, la contaminación que produciría la istalación d’una planta d’asfaltu caliente en Llera sedría incompatible col desendolcu de la ganadería, agricultura ya’l turismu caltenible, que tienen de ser, al so entender, los pegoyos de la economía del conceyu

La Plataforma Vecinal Contra la Planta d’Asfaltu en Llera aconceyó, na  lluviosa mañana d’esti domingu, a más d’un centenar de vecinos que protestaron contra la istalación de la planta d’asfaltu en caliente prevista pola empresa Pavitek na cantera de Llera.Lo que diba ser una concentración finó por costituyise’n manifestación, ante l’afluencia de vecinos qu’acudieron a amosar la so refuga a la mesma.

Los moraores de los pueblos  d’al rodiu del llugar previstu pa l’allugamientu de la planta d’asfaltu concentráronse nel Parque d’Abaxo, dende onde decidieron marchar dica la Casa Conceyu, con voces de “Planta Asfaltu non” y “Planta asfaltu’n Llera, fuera, fuera, fuera”. El manifestamientu espontaneu finó cola llectura d’un manifiestu nel que la Plataforma Vecinal Contra la Planta d’Asfaltu en Llera, convocantes de la protesta, asoleyaben el so desalcuerdu cola istalación de la planta a pocos metros de les sos cases, destacando la proximidá de la cantera y de la planta prevista a les viviendes colindantes asina comu la incoherencia de que l’Ayuntamientu de Grau promueva la revitalización de la güerta’l conceyu al tiempo que dé vía llibre a una istalación contaminante na zona rural, insisitiendo en que tovía tán  a tiempu de posicionase y actuar en favor de los vecinos.

El  Plan Xeneral d’Ordenación Urbana del conceyu afita una distancia mínima de 500m dende les canteres a los núcleos rurales, lo que nun torga que Pavitek, aprofitando esceiciones y vacios llegales, lleve esplotando de magar el 2015 una cantera a menos de 200 metros de les viviendes.

La cantera actual -más averada a les cases de lo llegalmente permitio- ya tien consecuencies sobre la salú de los vecinos, que se quexen de tener qu’aguantar les volaures, polvarees ya’l tráficu pesáu, consecuencia de la so actividá, consecuencies que sedrán muncho piores de llevase alantre la planta d’asfaltos prevista. Nesti tipu de plantes quémense derivaos del petróleu que producen contaminantes asgaya, incluyendo’l canceríxenu bencenu y abondos metales pesaos, amás de partícules en suspensión.

Redaición InfoAsturies

This work is licensed under a Creative Commons Attribution 4.0 International License.