Dende la istalación, con motivu de la visita de la familia real española a Cuadonga en Setiembre l’añu pasáu, d’un miraor con nome “la Princesa” en plenu Parque Nacional de los Picos d’Europa, la refuga al mesmu foi xeneral. Lo que foi interpretao comu otru actu d’imposición españolista y monárquica tien tamién un componente d’estroza del paisaxe, nun entornu protexíu nel que, comu ficieron notar los ganaeros que viven allí, nun se puede nin iguar una pista o una cabaña ensin un cientu de permisos y papeleos.

Nesti casu l’ataque consistió na rotura d’un panel de cumes y delles pintaes con conseñes del tipu “Monarquía non, Asturies llibre”, nel mesmu sen que les que l’añu pasáu reclamaben “Independencia y socialismu”  y “Borbones fuera. República asturiana”. Nesta ocasión, amás, reclamábase la llibertá de los presos políticos.