Con más de 23.000 espeutadores nes caberes ediciones, la Selmana Máxica ya ye un festival reconocíu a nivel internacional, colocando a Xixón nel mapa mundial del ilusionismu
Ya tan a la venta les entraes pa les funciones de la Gran Gala Internacional del Festival IX Selmana Máxica, actu cientral del Festival, nel qu’actuen cinco de los meyores magos del mundiu y que tendrá llugar nel Teatru Xovellanos, pente’l 27 ya’l 29 d’Avientu; pero anantes y depués, de magar el 21 d’Avientu y dica’l 4 Xineru, les actuaciones de baldre en places, parques y cientros culturales enllenarán Xixón de maxa, seique entá nun se dio a conocer el programa completu.
Na Gran Gala participarán, baxo la direición artística de José Armas “El Ilusionista”, cinco de los meyores magos del mundiu: Nestor Hato (Francia), Campión Mundial FISM 2018 y Premiu d’Oru de “Manipulación” nel Campionatu Europeu de Maxa en 2017, aniciará la gala con un númberu con prestidixitación, fuéu y muncho ritmu. Iván Netcheporenko (Rusia), Ganador del Grand Prix del Campionatu Mundial y de numberosos congresos en tol mundiu, traerá la so actuación basada nel héroe de los cuentos rusos, Iván Zarevich. Erwan (Francia), famosu pol so espeutacular númberu con palombes. El Gran Dimitri fadrá rir, ablucar y aplaudir a partes iguales cola so mezcla de teatru, circu, clown, funámbulismu y cabaret y finalmente podremos ver a Víctor Cerro, un de los mayores referentes europeos nel campu la maxa estrema y l’escapismu, popular polos sos númberos d’altu riesgu.
El broche d’oru del Festival pondrálu Jeff Toussaint, famosu hipnotista que traerá’l so sosprendente espeutáculu al Teatru Xovellanos, convidando a los qu’asina lo quieran a subir al escenariu y ser hipnotizaos.
Redaición InfoAsturies
This work is licensed under a Creative Commons Attribution 4.0 International License.
