Nel añu 2018, ARALIA ganó’l concursu pa la xestión del Serviciu d’Aida a Domiciliu de Xixón, concesión non esenta d’alderique tres de la encarcelación nes mesmes feches del que fasta entós yera’l presidente de la compañía, José Luis Ulibarri, por operaciones poco tresparentes na concesión d’otros concursos de servicios públicos.
La xestión del SAD de Xixón entamó en Xunetu del añu pasáu. En menos d’ocho meses xuntó siete denuncies n’ispeción de trabayu y abondes quexes a l’alministración por parte de los usuarios, por incumplimientu de les condiciones roblaes en contratu; agora mesmo tienen dos espedientes abiertos dende la Fundación Municipal de Servicios Sociales pol impagu de pluses a les trabayaores.

El 3 d’Avientu del 2019, va una selmana, la empresa comunicaba a los sos trabayaores la suspensión de los pagos de les nómines con efeutu inmediatu, ello ye, que nun pagarán el mes de Payares nin paga estraordinaria a los más de 300 emplegaos que conformen la plantiya “por falta de lliquidez”.

Esta mañana el comité d’empresa del serviciu municipal aconceyaba pa decidir que facer en casu de qu’a díi de güei les nómines sigan ensin pagar. La idega ye que del conceyu salga un calandariu de protestes públiques y demandes xudiciales.

Del so trabayu depende la prestación d’unos servicios mínimos d’atención personal pa más de 1.400 dependientes del conceyu de Xixón. Los y les trabayaores deciden, por agora, continuar garantizando la prestación de servicios a estes persones, anteponiendo el so sentíu de la responsabilidá y el so valir humanu a los sos drechos llaborales, pero d’allargase la situación nun descarten facer paros.

Redaición InfoAsturies