El Sindicatu d’Ensiñantes SUATEA defende la homologación comu’l meyor mediu pa finar cola discriminación salarial al que los conderga la Conseyería d’Educación

Desque se fexo la tresferencia de les competencies educatives, va 19 años, el profesoráu asturianu ta a la espera de ver cómo se concreten les mesmes no que cinca a la so retribución salariar, ya que a desemeyanza de lo qu’asocedió n’otros territorios, onde se creó un complementu autonómicu, nel casu asturianu la Conseyería nun fexo xeitu d’ello.

El resultáu ye que’l profesoráu asturianu atópase, dientro d’un cuadru comparativu estatal, nos postreros puestos de la cola salarial. En concreto, los postreros en Secundaria y los terceros pembaxo en Mayestros/es.

Dende l’añu 2007 SUATEA vien reclamando a la Conseyería d’Educación que dea en la creación del citáu complementu pa xenerar una xuba llinial ya igual pa tolos cuerpos -mayestros y secundaria-,que forme parte de les retribuciones ordinaries a les que tienen derechu, ensin necesidá de condicionantes y que los iguale a lo que se cobra nel restu del Estáu, acabando asina cola discriminación hestórica que vien careciendo’l cuerpu docente asturianu.

Mientres estos años los sindicatos ANPE y UXT sofitaron, y agora siguen promoviendo, el sistema d’Incentivu a la Evaluación Docente como mediu prioritariu p’ameyorar  el salariu, condicionando la so percepción a la valoración positiva del equipu directivu,  que dexa fora a aquelles persones que tuvieron enfermes l’añu anterior (unes 300 esti últimu añu),  que nun se cobra nes pagues estraordinaries,  que nun se revaloriza cuando’l salariu xube (si se tratare de masa salarial, podría dir xubiendo col tiempu) y  que necesita cinco años d’espera pa poder ser cobráu.

Dende SUATEA denuncien tamién el posturéu d’estos sindicatos que, llueñe de buscar la xuntanza de les fuerces sindicales, “descuélguense con un enzarru que busca la propaganda mediática que los dexe apoderase d’una reivindicación, la homologación salarial, pero al traviés del perversu procedimientu de la evaluación  docente que discrimina a parte del profesoráu y estrafica económicamente entá más a los/les docentes”.

Redaición InfoAsturies

This work is licensed under a Creative Commons Attribution 4.0 International License.