Na cabera década Asturies perdió de manera natural más del 5 % de la so población, lo que sumao a los miles d’asturianos forciaos a emigrar fae qu’Asturies tenga agora menos moraores de los que tinía nos años 70.

Acordies los datos recientemente apurrios pol SADEI, el xorrecimientu natural de la población asturiana (la diferencia pente ñacimientos y defunciones) tornó a ser negativu nel primer semestre del añu, con un saldu de 4.126 persones menos, una cifra que cuasi duplica la perda del añu pasáu nel mesmu semestre. Esto supón que, ensin tener en cuenta los movimientos migratorios, Asturies perdió más de 22 persones por díe na primer metá del 2019, siendo’l territoriu  l’estáu nel que’l xorrecimientu vexetatitu da un saldu más negativu.

Estos datos enmárquense nun procesu de desaniciu que munchos ya dan en llamar el “xenocidiu asturianu” poles sos implicaciones ya’l so calter integrador, que ta finando non solo cola demografía, sinon condergándo al país a una tremenda falta de renovación xeneracional que pon en riesgu la recuperación económica y la tresmisión cultural y poniendo en pelligru la pervivencia mesma del Pueblu Asturianu comu tal .

Nesi sen, son llamatives les recientes declaraciones del Principado nes que proponen el fomentu de la inmigración a Asturies ya incluso la gueta de talentos de fuera, al mesmu tiempu qu’afala a la emigración de la mocedá asturiana -especialmente de la meyor formada- coles condiciones de vida que se carecen en país.