La Plataforma de trabayaores de CD y CRAD d’Asturies denuncia l’actitú de represión obrera de la empresa Gerusia, al sancionar con 15 díes ensin emplegu y sueldu, a 8 compañeres por secundar la fuelga del pasáu mes de Payares
Nel trescursu de les protestes poles condiciones llaborales y falta de conveniu que carez esti coleutivu, foron estipulaos los servicios mínimos espublizaos nel BOPA númberu 213 del 5 de Payares de 2019 comu “la prestación de sofitos na realización de les actividaes básiques de la vida diaria a aquelles persones que por su diversidá funcional y/o dependencia nun cuenten cola capacida pa desendolcales por si mesmes” . En cumplimientu d’esos servicios mínimos les acusaes acudieron al so trabayu, llendándose a cumplir estes funciones, permaneciendo nel so puestu dende l’entamu a la salida de los sos horarios avezaos.
Sicasí, nun consideraron que s’incluyere pente los mencionaos servicios indispensables d’actividaes básiques vitales el tresporte n’ambulancia, subcontrataes por otra empresa, ensin qu’esos tresllaos foren imprescindibles pa la supervivencia y bientar de les persones dependientes, polo que nun realizaron esa parte del trabayu. No que los trabayaores consideren una maniobra pa amedranar y recortar drechos, la empresa considera qu’ello costitui un abandonu del puestu de trabayu ya un incumplimientu de los servicios mínimos y sanciona a les ocho trabayaores a quince díes ensin emplegu nin sueldu.
La Plataforma de trabayaores de CD y CRAD d’Asturies conderguen esta actitú, que recorta’l drechu a la fuelga, y critiquen el sofitu al xuegu suciu de la empresa por parte de terceres persones, concretamente personal de l’alministración de determinaos cientros.
Estes trabayadores lleven más d’un añu ensin tener noticies de la patronal del seutor pa la negociación d’un conveniu xustu, polo que siguen ensin xubíes salariales y con contratos precarios. Por tou ello anuncien que saldrán a la cai el vienres 27 d’Avientu a les 19:30 na plaza Porlier d’Uviéu, pa facer pública la so situación y denunciar les actuaciones illegales de la empresa Gerusia.
Redaición InfoAsturies
This work is licensed under a Creative Commons Attribution 4.0 International License.
