El 21% de les persones dependientes n’Asturies siguen esperando la valoración que-yos permita recibir la prestación a la que por llei tienen drechu

L’Oservatoriu la Dependencia espublizó ayeri’l so tercer informe sobro’l Sistema pa l’Autonomía y Atención a la Dependencia (SAAD), informe que los servicios sociales asturianos suspenden sistemáticamente. Nesta ocasión, l’informe destaca l’amenorgamientu de les llistes d’espera (el llamáu llimbu de la dependencia) na mayoría del estáu, nun siendo asina n’Asturies onde entá esperen a ser revisaos 11.207 espedientes. L’informe resalta tamién la cayida del pesu de les prestaciones económiques nel gastu total.

Son 26.928 los asturianos que tienen reconocíu’l so drechu a una ayuda pola so dependencia, anque solo 21.198 la reciben: los 5.730 restantes tán esperando perella, anque la tengan reconocía. Otros 5.477 continuen esperando una valoración que munches vegaes llega sero: un total de 11.207 persones -el 21% de los dependientes asturianos- que precisen aida pa cubrir les sos necesidaes básiques diaries pero que, gracies a la ineficiencia de la Conseyería de Serechos Sociales y Bienestar, nun reciben l’aida prevista na Llei de Dependencia.

El tiempu mediu d’espera por un dictame nun tendría de superar, por llei, los seis meses, pero los asturianos esperen una media de más d’un añu, 431 díes, por una rempuesta que, anque seya afirmativa, non siempres significa que vaigan entamar a recibir l’aida, yá que en munchos casos la valoración del gráu allarga’l procesu entá más. La consecuencia ye que ca díi muerre siquier un asturianu dependiente ensin entamar a cobrar esta prestación.

Nuria Prendes

This work is licensed under a Creative Commons Attribution 4.0 International License.