Pesi a la intervención de la Guardia Civil, el piquete permanente continúa presllando la entrada y salida de camiones dende’l cientru lloxísticu qu’Alimerka tien en Llanera. Les trabayaores necesiten de la collaboración y comprensión de tolos asturianos pa que la fuelga seya un ésitu

Güei entama’l tercer díe de fuelga nos supermercaos Alimerka, Más y Más, Dia Plaza y Arco. Dende la nueche del xueves les y los trabayaores afeutaos (más de 12.000) dan exemplu de llucha, non solo faciendo fuelga, sinon entamando piquetes -non siempres respetaos poles fuercies de seguridá del estáu español- convocando multitudinaries concentraciones ya torgando la reposición de productos nos supermercaos.

L’aición más importante nesti conflictu ta siendo el bloquéu del cientru lloxísticu dende’l qu’Alimerka distribui alimentos a los sos 128 establecimientos y que remanez preslláu dende les doce la nueche del vienres 21. Ayeri a les 18 hores llanzaben esti pidíu d’ayuda peles redes “Alimerka agora, la clas trabayadora asturiana en llucha necesita refuerzos. Tamos rodeaes de gc. Acude y sofita a Llanera. Hai qui’impedir salir a los camiones a les 19h”. La rempuesta de los asturianos y asturianos que s’averaron a agabitar esta llucha foi determinante y seique la intervención de la Guardia Civil, sacando pola fuercia a los manifestantes de la carretera, despexó’l camín durante un tiempu, permitiendo la entrada d’un únicu camión, la insistencia y la resistencia de los manifestantes, que tornaron a bloquear el pasu una y otra vegada cortando la carretera, consiguió que finalmente se llegare a un alcuerdu: presllaríen la entrada y salida de camiones ensin que les fuercies de seguridá intervinieren, siempres cuandu nun cortaren el tráficu de la carretera xeneral.

Les trabayaores pidin sofitu a la población asturiana: nun mercar en supermercaos demientres la fuelga, acudir a les concentraciones y sofitar el bloquéu de la cientral lloxística participando nel relevu de les persones que tan allí pa garantizar la so continuidá.

Nuria Prendes

This work is licensed under a Creative Commons Attribution 4.0 International License.