Con media Asturies n’alerta por contaminación el presidente del “Principado” permítese llamar l’atención al gobiernu madrilanu pola polución na capital del reinu

Col protocolu de contaminación activáu en Llangréu y Uviéu y Xixón, Sieru y Avilés a piques d’ello, entantu s’encadenen los díes con valores estratosféricos por contaminación en tola fastera cientral d’Asturies, Adrián Barbón mandaba regar les cais comu midía preventiva y unviaba tuits a Madrí.

“Por favor, que daquién mande esto a la Presidenta de la Comunidá de Madrí” puede lleese nel tuit subíu por Barbón na tardi d’ayeri, xunto con un enllaz al informe de los riesgos de mortalidá por contaminación del aire urbanu espublizáu tres del analís de 652 ciudaes y qu’amuesa l’espoxigue del riesgu de mortalidá tres de la esposición incluso a piqueñes concentraciones de contaminación del aire urbanu.

La reaición de los asturianos nun se fizo esperar: decenes de tuits nos que se-y remembraba a Barbón que onde elli gobierna ye n’Asturies, non en Madrí, y que los problemes de contaminación del nuesu país precisen de la so atención y d’actuaciones darréu.

Comentarios del tipu “Esmolezte por Asturies y escaezte de Madrí y de tantu peloteo a Pedrito” “¿Tien vusté daqué que dicir de la contaminación que diariamente anubre Xixón?@AdrianBarbon” o “Echay un güeyu ya de pasu y revisa los niveles de contaminación de les 3 principales ciudaes asturianes con Uviéu nel Top10 d’España y la más contaminada de tol norte@AdrianBarbon” respuenden al presidente, que nun retruca a denguna d’elles. Pero sobre too destaquen los comentarios del tipu “Por favor, que daquién mande esto al presidente d’Asturies@AdrianBarbon” acompangao de les caberes noticies, semeyes y datos sobre la emerxencia por contaminación que se ta viviendo n’Asturies nos caberos díis ya incluso años.

Nuria Prendes

This work is licensed under a Creative Commons Attribution 4.0 International License.