Inxeniería Ensin Fronteres Asturies pon a llibre disposición la descarga d’un calendariu de verdures de temporada del país col envís de favorecer el comerciu y l’agricultura llocal al tiempu que se curia del mediu ambiente

Col fin de promover y guiar nel consumu de productos de temporada nel país, Inxeniería Ensin Fronteres vien d’espublizar unos calendarios descargables de baldre coles verdures de temporada mes a mes. La idega ye guiar al consumidor a la hora d’escoyer los productos llocales propios de ca mes, ya que agora mesmo pueden alcontrase cuasi toles verdures tol añu nes tiendes por mor de la so produción n’ivernaeros y la so mauración y caltenimientu en cámares. Los productos de temporada xeneren una menos emisión de CO2 y les verdures llocales tienen un menor impautu al non necesitar treslláu, envase plásticu nin almacenamientu. Amás, ven perimportante el consumu de verdures del país comu forma d’impulsar la economía llocal y caltener la biodiversidá.

Les frutes y verdures pañaes nel puntu de mauración son más saborguioses y con mayor conteníu de nutrientes, deteriórense menos y son más económiques. Recomienden amás mercales en comercios de prosimidá, sofitando el desendolcu de la economía llocal allonxada de les grandes cadenes d’alimentación.

Estos calendarios tan disponibles de baldre pa imprimir y poner la páxina del mes que correspuenda na puerta la xelera, pa tener siempres presente les verdures que nun tienen de faltar  na llista la compra, y saber cuáles son les que tan nel so puntu.

This work is licensed under a Creative Commons Attribution 4.0 International License.