CCOO y UXT desconvoquen unillateralmente ya ensin consultar anantes a les trabayaores les concentraciones que les Ausiliares del SAD veníen faciendo los xueves delantre  la Gota Llechi de Xixón y que foren decidíes por mayoría en conceyu

El 3 d’Avientu del 2019 la empresa ARALIA comunicaba a los sos trabayaores la suspensión de los pagos de les nómines con efeutu inmediatu, ello ye, que nun pagarien el mes de Payares nin la paga estraordinaria a los más de 300 emplegaos que conformen la plantiya “por falta de lliquidez”, motivu pol que se decidió en conceyu aniciar movilizaciones fasta qu’esti ya otros problemes llaborales venceyaos a la empresa se solucionaren.

Fasta agora, namás una parte de los emplegaos entamaron a cobrar una parte de los atrasos; los que ya nun tan en plantiya por tener contratos temporales nun recibieron res y naide recibió los atrasos de los pluses de fin de selmana. Tampoco s’esclariaron entá les denuncies previes por incumplimientu de contratu interpuestes ante ispeción de trabayu contra la empresa. Sicasí, CCOO y UXT deciden pola so cuenta desconvocar les protestes a un díe d’esclariase si mañana los emplegaos van a cobrar o non la so nómina, llevantando la presión sobre la empresa nun intre decisivu.

Esta aición concuerda cola trayeutoria d’estos dos sindicatos, los mesmos que desconvocaron va unos díes la esitosa fuelga de los supermercaos asturianos, cuando más repercusión taba teniendo y namás a cambiu d’un hipotéticu conceyu futuru cola empresa pa negociar, ensin afitar dala concesión y faciendo perder la oportunidá única qu’esta fuelga nes fiestes navidiegues representaba.

Nuria Prendes

This work is licensed under a Creative Commons Attribution 4.0 International License.