Pa la portavoz del PSOE, Adriana Lastra, Asturies nun ta en decadencia, y pa Martinez Oblanca, de Foro, lo importante ye que viva España. A dengún de los dos yos importa qu’Asturies muerra, porque nun se puede interpretar más que comu la muerte d’un país la despoblación de más del diez por cientu de los sos nucleos habitables
Asturies cuenta con 6.342 poblaciones singulares, ello ye, nucleos habitables, sumando ciodaes, aldegues, villes, poles o caseríes, más del 10% de les 61.788 que se contabilicen en tol estáu. En 5.595 viven menos de cien persones y na cabera década 1.058 d’elles quedaron ermes, sumando les 755 que quedaron vacies dafechu y les 303 nes que mora namás una persona. Amás, en 3.129 viven 10 persones o menos, munches d’elles xente mui mayor que refuga camudar la so vida al final de la mesma y que nun cunten con relevu xeneracional pa caltener la so forma de vida, la más tradicional del país y la más venceyada a la tierra.
La inmigración nun ye salida a esta sangría, non solo porque’l saldu migratoriu ye compensáu colos asturianos qu’abandonen el país diariamente a la gueta de condiciones dignes de trabayu, sinón porque los inmigrantes allúguense principalmente nos grandes nucleos de población, onde ya moren el 70% de los asturianos y nos que subsisten con trabayos d’alta precariedá, ensin poblar les fasteres rurales. Per otru lláu, de nun ser quien a integrar a estos inmigrantes a la cultura asturiana, la so presencia nun aportaría res a frenar el xenocidiu cultural que se carez n’Asturies.
This work is licensed under a Creative Commons Attribution 4.0 International License.
