Nos tiempos caberos les campañes d’Andecha Astur nes redes sociales denunciando’l procesu d’aceleráu despoblamientu baxo l’entítulu de “xenocidiu anunciáu” tan resultando especialmente impautantes, pero tamién tan xenerando un ciertu alderique alrodiu de lo corrrecho d’emplegar esti términu pa referise a lo qu’ocurre n’Asturies.

Güei, dende InfoAsturies entrevistamos a Llucía Fernández, que respuende a estes custiones d’actualidá

¿Pue falase d’un xenocidiu del Pueblu Asturianu?

Nun hai que quedase superficialmente nel términu, sinon nel mensaxe. Nós utilizamos el términu “xenocidiu” en RRSS polo que tien d’espresivo, y porque marca la gravedá de la situación, nun tamos desendolcando un analís políticu, sinon denunciando una rialidá estrema.

Entós, ¿nun podemos falar de xenocidiu asturianu?

Claro que podemos, porque la gravedá de la situación demográfica y social a la que tan llevando Asturies xustifícalo. Ye un xenocidiu en cuantes a qu’intenten  destruyir un Pueblu, l’asturianu, ye cierto qu’ensin masacres, pero sí xenerando munchu dolor y munchu sufrimientu. Si quinxéremos ser más precisos tendríemos que falar de xenocidiu de baxa intensidá.

De toes formes lo qu’Andecha Astur pretende nun ye faer un analís a esi nivel, sinon llamar l’atención de la sociedá sobro esta rialidá, utilizando un términu que precisamente faiga eso, impautar, llamar l’atención.

Pero’l despoblamientu y la emigración nun ye un fenómenu esclusivamente asturianu, hai otros territorios del Estáu español en situaciones asemeyaes.

Aparentemente pue ser, pero n’Asturies nun se da una “cris demográfica” al usu. Partimos d’una nación receptora de población a la que se somete a un procesu de desindustrialización xabaz, de destruición de los seutores productivos y d’agresión y d’esaniciu de la cadarma socio-económica tradicional, y onde s’exerce una descomanada presión  sociolóxica pa convencer a la mocedá pa qu’emigre. Ye difícil atopar daqué asemeyao na Europa d’anguañu.

Entós por que hai xente a la que-y paez mal que s’emplegue’l términu “xenocidiu”?

Home, la mayoría de la xente cola qu’interacionamos peles RRSS atalanta perfechamente’l mensaxe y empatiza con elli, nun hai más que ver como se comparten y los comentarios que recibimos.

Nun planu más presonal el nivel d’aceptación ye entá mayor, porque espresa perfechamente lo que siente la sociedá asturiana énte esta agresión. “Tan acabando con nós”, y “quien esaniciamos” son espresiones que sentimos de contino cuando se fala d’esti tema.

Pero hai xente que considera qu’usar esi términu ye menospreciar los xenocidios hestóricos, con matances xeneralizaes.

Sí, pue ser, pero normalmente nun ocurre así. El términu xenocidiu cultural o xenocidiu franquista ye enforma asumíu, y naide camienta en masacres de poblaciones, y cuando usamos espresiones como “dar guerra” nun se ta despreciando’l sufrimientu de los pueblos en guerra… o la espresión “sangría humana” nun da en camentar en que naide tea desangrándose… Ye más, ente les definiciones de xenocidiu ta la de «cualisquier de los actos perpetraos cola intención de destruyir, total o parcialmente, a un grupu nacional, étnicu, racial o relixosu como talu» que s’afayaría perfechamente a lo que ta faciendo l’Estáu español con Asturies

Nun hai dengún menospreciu, lo que ocurre ye qu’hai quien s’escuda nel reducionismu semánticu pa xustificase políticamente.

De fechu, si vamos a la definición de xenocidiu «cualesquier de los actos perpetaos col enfotu de destruyir, total o parcialmente, a un grupu nacional, étnicu, racial o relixosu como tal» vese que ye lo que ta pasando n’Asturies. La desindustrialización y la sistemática destruición del texíu socio-económicu asturianu respuende a una planificación política mui consciente, y los sos efeutos, el paru, la precariedá, la emigración forciada, y la cayía de la natalidá ponen en pelligru la esistencia del pueblu asturianu como tal.

¿Xustifícase políticamente?

Claro, lo políticamente correcho ye falar de “cris demográfica”, que ye un términu neutru y que nun implica responsabilidaes. Cuando falamos de “xenocidiu anunciáu” falamos de responsabilidaes polítiques, de la esistencia d’una planificación determinada del Reinu d’España a la gueta precisamente d’esos resultaos.

Esta rialidá ye mui dura de xustificar, especialmente pa quien caltién un posicionamientu sucursalista, ainda más si se va de “progre”, porque implica que tan del llau del enemigu, que son collaboracionistes del Reinu d’España en tou esi procesu, y que son corresponsables.

Por eso, a falta d’argumentos recurren a la lliteralidá del mensaxe, non al fondu.

¿Pero por qué pasa esto? ¿España tien manía a los asturianos? ¿ódienmos?

N’home non, ye too muncho más cenciello. Per un llau les planificaciones económiques del gobiernu central dependen del poder políticu de los estremaos territorios. Si n’Asturies hai un “Principado” sumisu que nun gutia a ná, y otres naciones del Estáu tienen poder políticu y defenden los sos interes, les inversiones económiques dirán a eses naciones. Ye normal.

Pero sobro too, el Reinu d’España tien un descomanáu problema coles naciones que tien baxo’l so dominiu, especialmente Catalunya y Euskal Herria, y anque n’Asturies mos impunxeren un Estatutu y un “Principado” col que llindiamos, lo cierto ye que toles encuestes sociolóxiques amuesen una concenxa nacional asturiana enorme, mayor qu’en dalguna de les mal llamaes “comunidaes hestóriques”, y una desafección a España y lo español imensa. Pa ellos, y como dixera l’espresidente del “Principado” Vicente Álvarez Areces, “El problema ye qu’Asturies tien demasada identidá”.

¿Cómo puen controlar eso? Pues asimilándomos. Desindustrializando y destruyendo’l conxuntu del texíu socio-económicu, la identidá cultural, y forciando a la emigración de la mocedá, de tala miente que d’una nación industrial, económicamente viable, con un nivel formativu altu y demográficamente ascendente, acaben faciendo una provincia cola mitá de la población y social, económica y culturalmente dependiente de Madrid.

Nun ye que mos odien, ye qu’esiste un conflictu d’intereses, ellos quien una provincia española más, “una hermosa provincia del norte”, y nós queremos seguir siendo una nación.

¿Hai alternatives o hai que dase definitivamente?

Hai alternatives, costrúinse díi ente díi, y nello Andecha Astur ye y sedrá incansable. El Pueblu Asturianu ta respondiendo con rixu a les polítiques asimilacionistes españoles, non solo defendiendo ca puestu trabayu, la identidá y la cultura asturiana, sinon tamién resistiéndose a emigrar. La entereza de la mocedá asturiana frente la emigración ye heroica, con munchu sufrimientu, pero resistiendo.

This work is licensed under a Creative Commons Attribution 4.0 International License.