Llucía F. Marqués
Si dacuando vos aburrís o sentis que nun hai porque lluchar, propongovos un esperimentu: busca-y en Google “Asturies pierde” y escoye-y tema
Tecleo’n Google “Asturies pierde” y salten noticies comu si foren cascoxos en díi de lluvia. Asturies pierde 12 moraores al díe -lo que vien a ser, 84 a la selmana, ún ca dos hores, 360 al mes, pa que mos quede claro- ; Asturies pierde 20.000 trabayaores nun añu pola so marcha a otres rexones (El Comercio, 6 d’Ochobre); Asturies pierde otros 5.574 habitantes nun añu (LNE, 11 d’Abril); Asturies pierde cuasi 2000 votantes en 7 meses (La Voz d’Asturies, 26 de Setiembre); Asturies pierde competitividá, queda a nivel de Córcega (8 Ochobre, La Voz d’Asturies); Asturies pierde 29 biblioteques pente 2016 y 2018 (La Vanguardia, 16 d’Avientu); Asturies pierde’l 53% de les esplotaciones bovines (La Gaceta del Gourmet, 31 d’Avientu); L’Aeropuertu d’Asturies pierde’l 20% d’usuarios nun añu,Asturies pierde 35 comercios al mes nel caberu añu, pierde la esclusividá de la botella verdi de sidra, pierde les sos caberes mines, pierde 755 pueblos, pierde trabayadores foriatos, pierde na negociación de les cuotes pesqueres, pierde más de 10.000 autónomos nun añu, pierde posiciones n’anovación, pierde 38 unidaes d’infantil y primaria, pierde un escañu… Son toes noticies d’esti añu, con datos contrastaos por organismos comu l’INE, el Sadei y otros asemeyaos.
Cauna d’estes noticies foi recibida por un númberu indetermináu, pero altu, d’asturianos que xingaron los costazos con desgana y mermuraron “Ye lo qu’hai”, agradeciendo nel fondu qu’entá nun yos tocó a ellos y al tiempu -equí vien lo grave- asumiendo que anantes o dempués va tocayos la disgracia, pero que nun pueden facer res pa evitalo, como si en llugar de falar de consecuencies direutes de polítiques concretes -y camudables- toviéremos falando del inesorable movimientu de los astros celestes.
Yo pertenezo al escasu porcentaxe al que se-y retuercen les vidayes y yos pruyen les manes ya’l celebru a la gueta de culpables y soluciones. Entós ye cuando esconsoña’n mi esa teórica de la cospiración que tantes miraes condescendientes prevoca “¿de verdá esto puede ser casual? y si nun lo ye ¿hai a quien-y pueda interesar qu’Asturies pierda soberanía enerxética, económica, alimenticia y política?” dexo la entruga al debalu.
No más fondo, lo que más m’esmolez de tou esto ye qu’Asturies pierde capacidá de reacionar ante tolo que pierde y pierde asturianos con ganes de lluchar por ella. Los que quedamos tendremos que lluchar el duple.
This work is licensed under a Creative Commons Attribution 4.0 International License.
