El sindicatu d’estudiantes SUATEA anicia una campaña contra la “cultura del miéu que quieren imponer los seutores más reacionarios d’esta sociedá, que afeuta direutamente a la función docente del profesoráu” alvirtiendo del pelligru qu’implica esta vulnerabilidá

El sindicatu denuncia un espoxigue de los ataques y agresiones por parte de coleutivos reacionarios a la escuela ya’l profesoráu que, cumpliendo la llei, coeduca, polo que presenten una espublización que recueye la normativa y documentación llegal que protexe la educación pa la igualdá pente homes y muyeres. Estos ataques lleguen a llevar a los xulgaos al profesoráu, dao la capacidá económica de los nomaos coleutivos, lo que xenera un sentimientu de desproteción y vulnerabilidá a los docentes.

Sicasí, la llei ta de parte de los profesores: la llexislación estatal de obligáu cumplimientu a traviés de Lleis Orgániques, la llexislación autonómica, les estremaes normatives de la Conseyería d’Educación, los currículos oficiales de ca nivel educativu, les resoluciones internacionales d’organismos como la ONU, UNESCO, principios de Yogyakarta, etc.  protexen al profesoráu pa que se lleve a la realidá d’aula la educación pa la igualdad ya’l respetu a la diversidá sesual. En resume, la coeducación ye recoyía comu obligatoria en cuantos documentos relativos a educación podamos alcontrar.

Poro, col envís de dotar al profesoráu de recursos y estratexes pa la so defensa en caso de agresión vienen d’espublizar un compendiu de llexisllacion, normativa y documentación internacional, estatal y asturiana, “pa que la escuela pública faiga valer los sos drechos d’igualdá, el so deber d’educar una sociedá igualitaria que prevenga les violencias machistes, la so esencia d’escuela equitativa y equillibraora de desigualdaes ya’l so calter d’universal ya integradora de toles realidaes”.

Redaición InfoAsturies

This work is licensed under a Creative Commons Attribution 4.0 International License.