Una fienda ye, a cencielles, un indicador de desigualdá y poro, d’inxusticia; Asturies ta a la tiesta en fienda salarial pente homes y muyeres, cola fienda pente los que más tienen y los que menos medrando añu a añu, con una fienda descomanada pente les pensiones más altes y les más baxes, y tamién pente los cabezaleros na fienda dixital
N’Asturies coesisten dos versiones d’esta fienda teunolóxica: per un lláu los que, ensin emportar onde vivan, nun pueden permitise’l pagu del acesu a interné y per otru, los que viviendo nes fasteres rurales tienen de soportar tarifes enforma más altes que nes ciodaes o incluso la imposibilidá de coneutase por falta de cadarmes pa ello: n’Asturies entá son abondos los pueblos de más de 10 habitantes a los que nun aporta la rede.
Arriendes d’ello, l’avieyamientu de la población rural fae que munchos de los moraores d’estos pueblos nun cuenten siquiera colos conocimientos que yos permitirien aprofitar los beneficios que yos podría apurrir la rede. Interné podría ser un sofitu que contribuyere a fixar población nos pueblos, meyorando les comunicaciones, como ferramienta na xestión d’esplotaciones ganaderes y agrícoles, permitiendo aceder a recursos y servicios que nun s’alcuentren en piqueñes poblaciones -biblioteques, tiendes especializaes, estudios a distancia- o facilitando les xestiones cola alministración. Por contra, la so falta ye un argumentu más pal abandonu rural.
This work is licensed under a Creative Commons Attribution 4.0 International License.
