Mc. Donalds, la cerveza Bock, Netflix o Ikea son dalgunes de les multinacionales qu’apuesten pol usu del asturianu nes sos campañes publicitaries

Falar a una persona na so llingua llariega fae que’l mensaxe aporte más fondo que’n cualisquier otra, coneutando más direutamente colos consumidores y algamando meyores resultaos. Amás, tratándose de llechi, xugar la baza de l’asturianía ye asegurase una perceición de calidá estra.

Los responsables publicitarios de Danone sábenlo y nuna xugada maxistral adelanten a la Cientral Llechera Asturiana pela diestra cola so nueva campaña “Con lleche fresca de 50 granxes familiares asturianes”. Verdá ye que yos falla’l neutro materia (“lleche fresco”) y que namás ye una frase, -nel restu nun respeten nin la toponimia- pero ye la frase principal, en grande, apostando ensin rodeos pol usu la llingua.

La primer gran empresa n’utilizar l’asturianu foi Decathlon, colos sos cartelos de “Afayaivos” y les pegadielles de “espero que te preste” pero lo que tuvo especial sonadía foron los cartelos de “FAME” que fexeron a munchos naguar por una hamburguesa, mensaxe que, en versión diglósica, aprofitó KFC col so “si tienes fame, fame: pollo pollo”. Vieno dempués el “Beber pa creyer”, que consiguió con esa sola campaña cientrar l’atención nuna marca fasta entós pocu conocía, Bock, y los cartelos de “Esta nueche orbaya, quédate con Kevin en casa”, afalando a ver Netflix. Con mayor o menor aciertu, n’Ikea son continuos los guiños al asturianu, ufriendo unos “churrinos” o diciendo que “yos presta” venos -aprofitamos la ocasión pa ufrir el necesariu asesoramientu llingüísticu a Ikea, la intención ya la tienen- .

Por contra, les empreses asturianes qu’usen la nuesa llingua tienden a ser escases -viénseme a la tiesta una campaña d’agua de Cuevas, delles de cerveces artesanales y dalguna en versión billingüe de la DOP-. Son principalmente empreses grandes, de nivel internacional, con un altu presupuestu publicitariu y gabinetes d’espertos diseñando les campañes, les que se decaten del filón publicitariu de falar a la xente na so llingua,  poniendo de pasu de relieve’l provincianismu de les empreses asturianes, incapaces de pasar perriba los sos complexos -afitaos na dómina franquista- nin siquiera pol so beneficiu.

Llucía F. Marqués

This work is licensed under a Creative Commons Attribution 4.0 International License.