A entamos del 2020 hay 1845 pacientes más na llarga llista d’espera pa ser operaos, sumando un total de cerca de 24.000; cuasi el duple que va 14 años, cuando lo que yera l’Insalud treslladó a Asturies les competencies en materia sanitaria

Enfermar n’Asturies ye una odisea. Primero vas al mélicu de familia; meyor dicho, intentes dir, porque depende de onde tes puedes tener qu’esperar fasta 8 díes pa que te atienda, y si yes un rapacín del Oriente asturianu igual nun ties siquiera un pediatra disponible.

Si nun alicaste anantes de que toque la cita, lo más probable ye que tes pior, eso suponiendo que nun fartucaste d’esperar y fuiste por urxencies, onde topaste con otru fargatáu de persones como tú y tuviste que pasar, de media, ocho hores nuna sala atarraquitá de xente coles más estremaes dolencies, pa lluéu ser atendíu por personal sobrecargáu de trabayu ya ensin siquiera medios pa desendolcar la so llabor -nel HUCA denunciaben incluso falta de guantes-. Si lo tuyo nun yera gripe, tranquilu, ya la tienes, pero nun te ingresarán, non porque nun lo necesites, sinon porque nun hai cames.

Una bones t’atienden -en 3 menutos, que ye’l tiempu afitáu por persona nos 20 pacientes por hora que tienen qu’atender-  esperarás xunto con otros 71.036 enfermos los 78 dies qu’entarda de media  una consulta d’especialidá, de onde te mandarán a facer prebes, sumándote a los 30.541 pacientes que tamién esperen por elles  -cerca de diezmil necesiten una resonancia magnética-. Pol decretu de demores másimes, esto nun podría retrasase más de 60 díes por elles; sicasí, a nun ser que faigas una colonoscopia o una mamografía, va tocate esperar cerca de tres meses.

Supongamos que van operate. Entós ye cuandu entres na llista d’espera por antonomasia, la que tien a 23.906 asturianos en vilu, porque a munchos, lliteralmente, vayos la vida nello. Les demores más llargues equí superen el mediu añu, y son más de mil los asturianos nesa situación, pero calma, la media afítase en 83 díes.

Con tou esto lleves malu más d’ocho meses. Hai munches posibilidaes de que pa entós enpiorares enforma, que fores a un priváu o incluso que morrieres.

Les llistes d’espera empioren el pronósticu mélicu, la calidá de vida del paciente, puen ocasionar la muerte, y obliguen a muncha xente a recurrir a la Sanidá Privada.

Llucía F. M

This work is licensed under a Creative Commons Attribution 4.0 International License.