La fuercia del mensaxe tresciende les llendes de los países, nun tamos soles, nun somos culpables; la culpa ta del otru lláu, del lláu de los xueces, de la ilesia, del estáu, de la policía… del poder, en resume, del patriarcáu opresor, que ye un machu violador

Semeyes de Isabel B. Yende

Nun andes sola, ven pa casa que ta escuro, vas ensiñando más de la cuenta, una muyer que bebe paez mal, ¿que faceis tan soles? (nótese’l plural), vas prevocando, qué pintes tú pente tantu paisano, tápate, lluéu pasa lo que pasa… ¿Quién, qué muyer nun sintió eses frases, n’ocasiones bienintencionaes y otres firientes, pero siempres dañines?. Yera tiempu d’enllenanos les oreyes de lo contrario.

Aconceyase por cientos pa decilo al altu la lleva, comu ficimos güei cerca de mediu millar d’asturianes delantre la ilesia San José, comu fixeron muyeres ya de mediu mundiu, consigue que pali que pali toes vaigamos interiorizando daveres que nun tamos soles, que si toquen a una, salimos toes…  vamos quitando d’enriba la llosa de culpabilidá y miéu cola que la educación mos marcó dende bien neñes, quitanos esa venda de vulnerabilidá que güei simbolizábemos con trapos prietos nos güeyos.

Semeya de Isabel B. Yende

A les once y media la mañana entamaron los ensayos delantre la Casa Sindical, continuación de les práutiques n’estremaos llocales que munches veníen faciendo per toa Asturies, pa que la versión definitiva fore lo más organizada posible: nun ye cenciello coordinar a quinientes muyeres que nun se conocen. Sicasí, el ritmu de Les Pandereteres y Re-percusión feminista fízolo fácil, marcando’l pasu comu’l baltu un coral.

Prestó. Prestó tanto que nun queríemos colar y repitimos baille, aplaudimos, glayemos, alzemos el puñu y quedemos ellí en mediu la carretera, sintiéndonos fuertes, sintiéndo que daqué va camudando, que vamos defendenos… que con un pocu de suerte, les nueses fíes, les nueses nietes, nun vivirán el miéu.

Llucía F. Marqués

Semeyes de Isabel B. Yende

This work is licensed under a Creative Commons Attribution 4.0 International License.