La campaña “Peaxe non, ye un robu” ensiértase dientro d’otra más amplia, “Futuru p’Asturies”, na que la formación nacionaliega dirá tocando estremaos temes que ye imprescindible abordar p’afitar un futuru meyor nel país

Les aiciones tuvieron llugar na mesma autopista, en paraes de descansu, nes gasolineres y nes carreteres d’acesu a la mesma y consistieron en pancartes nes pontes, pegadielles y cartelos fasta nel mesmu peaxe y papelos informativos nos coches.

Con ello traten de poner l’acentu na discriminación qu’implica esti peaxe, que de fechu aislla a Asturies de la Meseta, gravando los desplazamientos de persones y mercancies, entantu nel estáu español les autopistes van lliberalizándose, cuestión que dende’l so puntu de vista ye intencionao “Pa nos, esto nun ye casual, sinon que s’enxerta nuna política que va aisllando a Asturies per tierra, mar y aire, incluso per interné, torgando al másimu cualisquier oportunidá de recuperación a tolos niveles y faciendo imposible’l desendolcu económicu. Cenciellamente, tan fundiendo Asturies”.

Al tiempu, nesta campaña denuncien la falsedá de los gobiernos, tanto del estáu comu dende’l “Principado” pol incumplimientu repetíu de les sos promeses “yá Zapatero prometió lliberar de peaxe nel 2004, lliberación qu’elleición tres elleición el PSOE ufierta dientru’l so programa y qu’a la hora de la verdá escaez dafechu, dándose’l casu de que l’actual gobiernu de Barbón pretende que mos conformemos con una cenciella rebaxa”.

La campaña ta teniendo perbona acoyía per parte la población en xeneral, tantu nes redes comu in situ, siendo abondos los conductores qu’espresaron la so conformidá col mensaxe de les pancartes.

Nuria Prendes

This work is licensed under a Creative Commons Attribution 4.0 International License.