La modificación del Sistema Inmediatu d’Información (SII) del IVA, puestu en marcha pol gobiernu d’España nel 2017, fizo que na prautica facienda nun devolviere la parte correspondiente al caberu mes del IVA, quedándose con 2.500 millones d’euros de los que 75 yeren de los asturianos
Facienda española niégase a devolver los 75 millones correspondientes a la lliquidación del IVA d’Asturies del caberu mes de 2017, allegando que la correción d’esa desviación “caducó” al nun se iguar l’añu pasáu pol retrasu de los presupuestos. Agora esos millones, dicen “son inesistentes”, lo que nun quita pa que per otru llau desixan qu’Asturies nun pueda esceder col déficit el 0’1% del so PIB, ello ye, unos 23 millones d’euros.
El “Principado” rendirá cuentes al gobiernu cientral n’Abril, pola xestión de los sos fondo nel 2019, y si les cuentes nun cuadren, ello ye, si el déficit pasa de lo permitío, Asturies tendrá que facer frente a les sanciones correspondientes. De fechu les cuentes nun pueden cuadrar, Asturies supera la llende fixada pol Ministeriu en tres vegaes lo permitio, una cifra que s’avera sospechosamente a los 75 millones que per otru lláu el mesmu Ministeriu de Facienda se niega a devolver.
Llucía F. Marqués
This work is licensed under a Creative Commons Attribution 4.0 International License.
