De los creadores de “Les feries d’Abril y les Oktoberfest atraen xente a Asturies” y de “El turismu va sacanos de probes” aporta la película “Aporta comu puedas”, basada na odisea d’un garrapiellu de potenciales turistes que quieren venir a Asturies pero nun saben comu
Llucía F. Marqués
Vais perdoname que lo tome a coña. Nun queda otra, ye eso o chase a llorar. Ye que toi viéndolo
– Oh, querida, estes vacaciones pasámosles n’Asturies– (por respetu a los non políglotes faigo torna simultanea, pero facei por lleer con acentu guiri). – Pero verás, l’autopista del mar preslláronla, asina qu’en barcu nun lo veo. Per carretera… tienen una autopista de les más pelligroses d’Europa y pa enriba de pagu, nun ye plan. Ya’l tren d’alta velocidá nun saben lo que ye, asina que meyor n’avión… a ver… podemos escoyer pente 16 tresbordos estremaos, 15 n’España o un dende Londres… non, vuelos direutos dende’l continente, que va… ¿y los precios? meca, si con eso danos pa dir al Caribe… ya, lo que te decía, meyor a pata. O meyor nun vamos.
Que los mesmos que mos venden que’l turismu ye la panacea maraviosa que mos va sacar de probes, que nun importa perder el 30% de los emplegos industriales, el 50% de los barcos, en diez años, que cuasi meyor que desapaezan los emplegos agrícoles y ganaderos, qu’asina nun estorben al visitante, los mesmos dimpuestos a sacrificar cualisquier otra consideración al bientar de Mr. Marshal y a los petrodólares, digan que nun hai falta comunicaciones pa tener turismu ye una coña tamién, pero de mal gustu.
Pa ser sincera, el turismu pocu m’importa, xenera trabayu de baxa calidá, beneficios pocu repartios, estroza’l mediu ambiente y ye’l seutor más rapidamente perxudicáu ante cualisquier cambeu, el primeru en caer en toles crísis. Cuasi qu’agradecería dexar de pensar en sableres masificaes, pueblos colos pitos mudos y mastines mansos o en titulaos universitarios llimpiando la barra por enésima vegada mientres sirven el cachopu más cualificáu de la hestoria.
Pero ye que les comunicaciones, esos vuelos internacionales que desapaecen, esa autopista con fielatu que mos fae de frontera, esa autopista la mar perdía, esi tren que nun furrula… nun solo torguen turismu, sinón el desendolcu económicu, el tresporte, el xorrecimientu cultural, la mesma vuelta a casa de los cientos de miles d’emigraos, el futuru mesmu d’Asturies. Y yá nun tamos pa tanta coña.
This work is licensed under a Creative Commons Attribution 4.0 International License.
