Mariano Suarez Rodríguez

Hai 36 años qu’España castiga a Asturies a ser nación-llaboratoriu del “pin parental”, cola “voluntariedá” nel enseñu l’asturianu. El PSOE llantó equí la táutica facista de permitir a les families torgar nes escueles l’enseñu de materies que son drechos homanos básicos

Ríos de tinta y pólvora moyao percuerren cenáculos y tertulies del Estáu español. ¿Motivu? La estrema drecha que representa Vox pidi que les families tengan drechu a usar un nomáu “pin parental” (ñidiamente, un drechu vetu) a les actividaes que desendolquen los centros educativos comu complementu a les asinatures, especialmente si tienen rellación con materies d’educación ya identidá sesual. Asina, ensin más, tol patiu políticu español foi sescudíu darréu por un tsunami que resulta ser falsu, interesáu ya inxustu pa con Asturies.
Sí, porque hai 36 años qu’España castiga a Asturies a ser nación-llaboratoriu del “pin parental”. España llantómos esti drechu al vetu facista cuandu tuvo de reconocer el drechu a escolarizar la llingua asturiana. Entós, comu yá tenía previsto nel Estatutu d’Autonomía que mos prohibió votar en 1981 (sí, hai 39 años), obligó a que les families pudieren determinar si respetaben o non el drechu universal de los pueblos a caltener la so llingua (“Artículu 4º. Puntu 1. El bable gociará de proteición. Promoveráse’l so usu, el so espardimientu nos medios de comunicación y el so enseñu, respetanto en tou casu, les variantes llocales y la voluntaridá nel so deprendimientu”).
Ye curioso. Hai cuasi 40 años, comu lo que se vetaba castigaba la condición identitaria de les y los asturianos y afitaba l’españolismu cultural y políticu, el PSOE y los demás partíos españoles nun lo nomaron “pin parental”, sinón “drechu de les families a escoyer voluntariamente”. Anguañu, cuandu lo que se pue vetar ye l’asistencia o non a charres de formación sesual, los aparatos ideolóxicos y mediáticos del Estáu glayen señalando qu’esa posibilidá de vetu fai tremar los pegollos de los drechos homanos.
Comu siempres, España usa dos vares de midir: una engañosa variquina seudodemocrática cuandu ye pa defendese ella y una bona porra policial cuandu ye p’apalizar asturianes y asturianos que vindiquen el futuru d’Asturies.
Y ye qu’España, siempres que les asturianes y asturianos vindicamos custiones llingüístiques, llaborales, económiques, presupuestaries, competenciales…, España siéntamos mal comu espaciu vital. Siéntamos mal cuandu ye dictaúra. Siéntamos mal cuandu ye república. Siéntamos mal cuandu ye monarquía. Siéntamos mal cuandu gobierna’l PP, el PSOE, el PSOE con IU, el PSOE con Podemos… Cenciellamente, España nun ye un espaciu p’Asturies.
Que mos lleve castigando cuasi 40 años con un “pin parental” antiasturianu y qu’agora faiga que s’espanta de los pines de Vox, ye la meyor preba de qu’España ye la “Malamadre” de los estaos europeos que tovía primen naciones nel so interior.
Y nun tamos por tener siguir aguantando una “Malamadre”, yá sólo tamos por axuntar toles enerxíes de les asturianes y asturianos pa xestionar en positivo un réxime democráticu propiu que garantice’l futuru’l nuesu pueblu. Asturies ye tan importante, tan valiosa, tan nuesa que nun pue ser d’otra manera.

This work is licensed under a Creative Commons Attribution 4.0 International License.