Les muyeres d’Asturies tan convocaes a una apostasía feminista masiva el prósimu 6 de marzu pa toles que nun quieran siguir sofitando la ilesia católica “nin siquier col silenciu”

Apostasía Feminista entama una nueva apostasía grupal con argumentariu feminista. Seique ta dirixía más especificamente a muyeres, los homes que quieran xunise a esta causa y aprofitar la ocasión p’abandonar la ilesia católica, con tolo qu’implica, sedrán bien llegaos.

Pa poder llevar el trámite a cabu ye preciso cuntar con una riestra de documentos que tendrán de lleváse preparaos ya esi díe: fotocopia del DNI compulsada en Comisaría, la partida bautismal, que tendrá de solicitase na parroquia onde tuvo llugar el bautizu, el formulariu de la diócesis, una carta d’apostasía feminista colos tos datos de la que puedes abrir modelu en google drive , un llistáu de los documentos apurrios y si lleves los papeles d’una compañera, una autorización roblada.

Los motivos d’esta apostasía recuéyense na carta que ye necesario llevar actualizada colos datos personales: que foron bautizaes ensin el so consentimientu de mui neñes, que se declaren al marxe de cualisquier creencia relixosa, acoyéndose pal so modelu de vida y de conducta a los principios éticos y modelos de conducta llaicos y que nun deseyen formar parte d’una istitución responsable de tantu dolor y carecimientu a lo llargo de sieglos.

Amás de tolo anterior, faen una referencia espresa a motivos que afeuten de manera direuta a les muyeres “Porque ser miembru y dar el mio sofitu, seique seya namás col silenciu, a una istitución que mos maltrata y humilda sedría una traición a mi mesma y al restu de muyeres del mundiu”, pasando a continuación a enumerar los agravios cometios pola ilesia contra la muyer: el control de los cuerpos de les muyeres, de la so economía, les violencies perpetraes y/o consenties contra la muyer y un llargu etcetera perfechamente argumentáu col que se solicita la esclusión de la ilesia católica darréu.

P’apautase toes hai un grupu de Wassap activu al que quien quiera pue apuntase.

Nuria Prendes

This work is licensed under a Creative Commons Attribution 4.0 International License.