Del analís fechu sobro los datos demográficos y les estadístiques industriales o empresariales despréndese que los recursos aplicaos nel plan de desendolcu pa les comarques mineres nun tuvieron impautu na creación efeutiva d’emplegu nin na fixación de la población nes zones afeutaes

1.780 millones d’euros, correspondientes a les aides a la reactivación de les contornes mineres nel periodu 2006 y 2017, nun tuvieron un siguimientu efeutivu, según l’informe presentáu pol Tribunal de Cuentes, que cuestiona’l llabor del Institutu pa la Reestructuración de la Minería del Carbón y Desendolcu Alternativu de les Contornes Mineres (IRMC), ascritu al Ministeriu pa la Transición Ecolóxica ya’l Retu Demográficu, na xestión de les aides a la reactivación d’estes zones. Per otra parte, tampoco’l gobiernu del “Principáu” efectuó los estudios de siguimientu previstos nos Planes del Carbón. Sicasí, el T.C. nun va presentar cargos por estes irregularidaes, sinón que se conforma con encamentar “una meyora na so alministración”.

De los 1.780 millones, menos de la metá, 681, correspondieron a proyeutos empresariales que tendríen de crear emplegu na zona, iguando’l dañu de los preslles mineros y apangando la sangría demográfica. Estes sovenciones – que s’amenorgaron significativamente dende 2014- presenten un altu porcentaxe de desistimientos, nun tán debidamente xustificaes nin se realizó un siguimientu de la execución de los proyectos subvencionaos. Alvirtiéronse nicios de malversación, como la contratación de prestaciones con persones venceyaes col receptor de la sovención, de les que nunca se verificó la so realización. Ello ye que nes cuenques perdióse emplegu y nun se xeneraron los puestos de trabayu esperables d’estes inversiones, pero les perres “desapaecieron”.

Los 1.005 millones d’euros restantes fueron a parar a infracadarmes que teníen d’ameyorar el nivel de vida nes cuenques, pero qu’en munchos casos nin siquier llegaron a facese, dándose’l casu de que delles de les subvenciones concedíes con cargu a esta llínea fueron oxetu de procesos xudiciales penales. Nun hubo esame de viabilidá previu nin tuvieron claros los criterios de prioridá a la d’escoyer los proyeutos, nin se xustificaron a posteriori les sovenciones concedíes.

Otru xeriátricu apaez equí, trayendo a la memoria l’esfalcu de Felechosa: el Centru de Día y Residencia de Vieyos en La Robla, entá en fase de costrución al zarru de la fiscalización ya ensin fecha de puesta en marcha, un proyeutu redactáu n’avientu de 2005 que contemplaba un costu envaloráu de 2.855.936 euros y un plazu d’execución de 24 meses.

No que cinca al grau de consecución de los oxetivos de les aides pa reactivación económica de les contornes mineres, l’informe conclúi que “nun se dispunxeron oxetivos ya indicadores afayaizos y concretos que permitieren efectuar un siguimientu y valorar la consecución de les metes de los mesmos y el so impautu” pero ello ye que nun se constata una recuperación demográfica, llaboral nin económica de les zones implicaes.

En resume, los cerca de dos mil millones d’euros fueron repartíos pente les conocíes redes clientelares del PSOE – FSA, ensin que’l restu de partíos nel gobiernu denunciare la situación nin tomara midíes, y catorce años dempués la situación non solo nun se revirtió, sinón que la crisis demográfico y económico de les zones mineres agrávase mes a mes.

Nuria Prendes

This work is licensed under a Creative Commons Attribution 4.0 International License.