El sábadu día 22 de Febreru l’asociación Proyeutu Carbayu y l’asociación medioambiental Biodevas, cola collaboración de voluntarios, realizarán la segunda repoblación de 2020 con árbol autóctonu nel conceyu de Parres (Les Arriondes)
Esta riestra de repoblaciones son col fin de dar solución a les problemátiques de les quemes forestales n’Asturies, d’una mena caltenible y procurando ameyorar la situación socioeconómica de la población rural. Ente elles, estes actuaciones dedicaránse a la creación de sistemes silvopastorales pa consiguir zones de campera a mediu y llargu plazu. D’esta forma, tórgase que se vuelva too monte y collo amenorga la probabilidá de quemes nos montes.
La población rural, urbana, alministraciones y el sector ganaeru atopen na asociación Biodevas la ponte que los xune y avera, llogrando l’entendimientu ente distintos colectivos de ganaeros, vecinos y ecoloxistes, qu’en munches situaciones atópense bien distantes.
En caúna de les repoblaciones, que van realizase aprosimao ca 15 díes, en función de lo que nos dexe’l tiempu, van llantase de 75 a 120 árboles autóctonos, amás de desendolcase llabores de caltenimientu na zona replantada l’añu pasáu.
Pa llograr más información y participar como voluntariu nestos plantíos, solo tienes qu’inscribite na páxina de Biodevas
Redaición infoAsturies
This work is licensed under a Creative Commons Attribution 4.0 International License.
