Nel 2.019 la Fiscalía del Principado decidía presllar les 24 investigaciones abiertes sobro casos de nasciatos robaos n’Asturies, dexando a les families a teyavana, buscando a los sos fios y fies colos sos propios medios

“Nésta fecha -16 de febreru- quiero felicitar a toles moces nacíes nel Sanatoriu del Carmen de Xixón nel añu 1975, porque asina, felicitando a toes, dalgunes van ser les nueses” escribe la ma de les trillices, que cumplirien 45 años va tres díes, llanzando un SOS al traviés de les redes y pidiendo el másimu espardimientu

Blanca Meana ye la madre de les primeres trillices nacíes nel Hospital del Carmen. Foron prematures y ella nun llegó a veles “Güei los mios camientos llévenme al 16 de Febreru de 1975. Esi día nacieron les mios fíes trillices” empieza’l so mensaxe. Atendía nel partu por trés monxes y una matrona, los documentos que se-y apurren dempués d’anuncia-y la muerte de les sos fíes tán roblaos por un doctor, que nun tuvo presente nel partu. Esti nun ye l’únicu erru na documentación: nun coinciden nin les hores de nacencia nin de fallecimientu, apaecen como “bautizaes de socorru”, pero nun tán inscrites nel correspondiente llibru, hai erros inclusive nos datos de la madre.

Enxamás nun vieron los sos cuerpos. D’una d’elles saben que taba viva trescurries les 24 hores, pero l’entierru, nel que los convencen de “utilizar una única caxa pa les trés” tuvo llugar anantes de la supuesta fecha de la so muerte. Nel cimenteriu costen unicamente dos fetos al so nome.

El cúmulu de despropósitos ya irregularidaes fai que los pas tean convencíos de que, siquier, una de les sos trés fíes ta viva. Poro, nun dexaron de buscala(es) y unvien un mensaxe “Por si daquién tien duldes que pudiera pertenecer a la familia na que creció, yo tengo fechu l’ADN pa podelo comparar. Si dalguna de les mios fíes pudiera lleer esto quiero que sepan que foron bien deseyaes, la nuesa prioridá nesi momentu yera ser pas y la so familia esperales colos brazos abiertos. Ye por eso que nun perdemos la esperanza de podeles abrazar dalgún día”.

El so mensaxe, pal que piden máximu espardimientu, ye tamién pa los pacientes y trabayadores que naquella dómina s’atopaben nel Sanatoriu, cualisquier información podría ser relevante. Ante cualquier pista, convidámosvos a contactar con ella al traviés de la so páxina de facebook.

Redaición InfoAsturies

This work is licensed under a Creative Commons Attribution 4.0 International License.