La Universidá d’Uviéu da un pasu más nel so compromisu cola llingua asturiana espublizando’l númberu ún de Glosema, revista científica de periodicidá añal, formatu lletrónicu y acesu abiertu específicamente dedicada a la llingüística y les ciencies del llinguaxe

Baxo la direición del profesor, filólogu y académicu de la llingua Ramón d’Andres col enfotu del profesoráu ya investigadores de les estayes de Filoloxía Española, Clásica y Románica, Asturiana, Inglesa, Francesa y Alemana, esta revista ciéntrase na llingüística y toles disciplines de les ciencies del llinguaxe, a les que se avera dende les sos estremaes perspeutives teóriques, con especial atención a la diversidá llingüística. 

Nel so llanzamientu inclui artículos de Gotzon Aurrekoetxea Olabarri (Euskal Herriko Unibertsitatea); Henri Boyer (Universitat de Montpelhièr); José María Brucart Marraco (Universitat Autònoma de Barcelona); Juan Antonio García Madruga (UNED); Georg Kremnitz (Universität Wien); Guillermo Lorenzo y Elena Vares (Universidá d’Uviéu); José Luis Mendívil Giró (Universidad de Zaragoza); y Enrique Pato (Université de Montréal). La revista présllase con un separtáu de reseñes d’espublizaciones académiques.

Glosema ye de baldre y ta disponible na Plataforma de Revistes de la Universidá d’Uviéu.

Llucía F. Marqués